的士死火話之你 官僚主義害死人

弊弊弊，香港實係又撞邪嘞，石油氣的士近日又離奇集體死火，分分鐘會車毀人亡。過去半個月，大批的士忽然跪低，有啲仲一日死火二十次，有的士團體已收到逾千宗的士死火求助個案，當中大部分都係喺中石化氣站加氣後出事嘅。

咁咪歷史重演？冇錯，今年年初就發生過同類事件，幾日之內有六千幾架的士同小巴齊齊死火，令業界人士慌失失，要求當局盡快查明「死因」。機電工程署成立專案小組，係威係勢查咗兩個幾月，調查結論笑甩人哋棚牙。佢哋話喎，死火事件係由多於一個原因造成嘅，講咗等於冇講。

本來，呢宗的士集體死火案有一條重大線索，就係出事嘅的士都喺中石化氣站加過氣，所以中石化嘅石油氣係最大疑兇，應該列入偵查範圍。機電署亦派人去中石化抽取樣本，仲送去內地同外國化驗添。

機電署開頭仲敢講吓真話，指出呢啲石油氣「沉降時間不足」，但係中石化隨即發表聲明，話沉降過程已跟足指引，反指當局冇足夠事實根據，機電署就拿拿臨轉軚，話石油氣冇問題，如果車輛定期保養，應可以正常運作。咁即係話，各位司機大佬，咪再怨天尤人嘞，返去好好保養自己架車啦。死得佢吖，膊頭一側就將成鑊嘢卸番畀業界，問你服未？叮！

其實，業界要求調查死火原因，只係想搞清楚，以免日後再發生同類事件啫。政府敷衍塞責，實在令人極為反感。有人直言，的士死火之謎永遠無法真相大白，以後肯定麻煩多多。

正所謂好嘅唔靈醜嘅靈，話口未完，集體死火續集就上演嘞，情節同上集驚人相似。業界懷疑，有公司近期引入唔適合本港的士用嘅石油氣，導致機件故障，要求當局調查。

一如所料，中石化堅稱，佢哋嘅貨源質量同運作均未見異常。機電署就話會跟進，但又話今年一月到依家公布咗九十三個樣本嘅化驗結果，顯示石油氣對車輛性能冇影響。咁即係點呀？咪又係叫司機食自己囉。

喂，家陣出咗新問題噃，無論點講都做吓調查先吖，機電署居然連做騷都慳埋，就拿拿臨閂定後門，實在太過分！之不過，如果的士死火事件陸續有嚟，始終會爆一鑊杰撻撻嘅，到時就知道乜嘢叫做官僚主義害死人嘞。叮你個鎯鎯！