削減開支博支持 申辦亞運仍浪費

港府計劃動用四百幾億公帑申辦二○二三年亞運會，有民意調查顯示，六成半以上受訪者反對。之但係，呢班官僚不嬲視民意如浮雲，公眾諮詢只係做戲咁做，申辦亞運會係偉大嘅形象工程，絕對唔會因為蟻民嘅反對就放棄。

雖然係做騷，都要做戲做全套嘅，嗱，亞運會臨時申辦委員會場地小組尋日提出一個大刀闊斧削減開支方案，將申辦亞運會嘅直接開支由原來預計嘅一百三十七億至一百四十五億，減到少於六十億。

身兼亞運會臨時申辦委員會主任嘅民政事務局局長曾德成話喎，政府十分理解社會對申辦亞運開支嘅關注，所以歡迎場地小組建議，令舉辦亞運直接開支減少超過一半。言下之意即係，一減就減一大半，夠順應民意喇啩，各位市民，唔該你哋唔好再反對啦！

政府咁樣做只不過係欲蓋彌彰。當日嘅預算唔係隨便計出嚟嘅，點解可以話減就減㗎？只有兩種可能性：一係原先就係開天索價，落地還錢；一係家陣壓低預算，呃市民支持，然後過咗海就係神仙，到時超支超到阿媽都唔認得，咪又係庫房埋單。

如果上面兩種估計都唔啱，都太陰謀論嘅話，咁仲得人驚。政府夾硬削開支，到時將亞運會辦到唔湯唔水，香港乜架都丟晒。大佬呀，申亞搞到咁勉強，搞嚟把鬼咩！叮！

其實，減幾多開支並唔係關鍵，問題係民意一面倒反對申辦亞運會，政府點解仲要一意孤行？曾德成話喎，申辦亞運會唔係搞生意，發展體育運動係民生需要。九唔搭八！

今時今日，香港最大嘅民生問題，唔係體育運動開展得好唔好，而係仲有一百幾十萬貧困人士急需支援，就算亞運會辦得幾成功，香港運動員攞獎攞到手軟，都冇辦法令窮人脫離貧困。政府與其浪費公帑貪慕虛榮，倒不如開倉派米接濟窮人。

仲有，咪以為香港成功申辦亞運會，高官就可以光宗耀祖。有辦睇㗎，當年廣州成功申辦亞運會，仲以為可以令城市建設大改觀，點知事與願違，籌備咗咁多年，直到開幕前仲係問題多籮籮，市容亂七八糟不特止，仲周不時爆發官民衝突。班官員變咗驚弓之鳥，連市民買菜刀都話要登記，搞到通街都媽媽聲。

為咗十幾日嘅輝煌，搞到神憎鬼厭，值得咩？港府如果一意孤行，廣州嘅今日，就係香港嘅明天。叮佢個鎯鎯！