昔日太一叮
有位長者前日到觀塘一間健康中心注射甲型及乙型肝炎混合預防針，護士打咗半支就停手，長者事後覺得頭暈同疲倦，收到健康中心通知至知疫苗有沉澱物，你話係咪靠害吖。
到底嗰啲沉澱物係乜嘢？食物及衞生局局長周一嶽話要派人調查喎。不過咁，醫療專家警告，疫苗出現來歷不明嘅沉澱物，可能因為疫苗擺得太耐發霉，亦可能係玻璃碎、膠粒等雜質，萬一有害物質注入人體，不但無法防疫，仲可能受到感染，後果真係可大可小o架！
話時話，雖然疫苗容易變質，但打咗發霉針真係匪夷所思。根據正常程序，打針前必須由兩個護士三查五對，冇可能睇唔到有沉澱物，唔使問阿貴，今次好明顯係有人冇跟程序做嘢喇。更加得人驚嘅係，至今未知同一批次疫苗有幾多，亦唔知究竟幾多人中咗招。
叮！公共醫療亂象多多，真係一波未平一波起。有位五十五歲男人肚痛肚脹，三個月前到北區醫院求醫，醫生居然話佢冇事，淨係幫佢開刀唧走小腸內多餘嘅水。病人出院後病情惡化，又經私家醫院轉往伊利沙伯醫院治療，但同樣搵唔出病因。結果兩次開刀，多次出入醫院，拖足三個幾月都未搵到病因，搞到病人成條小腸壞死，奄奄一息，要靠打嗎啡止痛同吊鹽水續命。
周一鑊尋日出嚟補鑊，話病人患嘅係好罕見嘅怪病，比較複雜。計太一叮話齋，最大問題唔係病怪唔怪，而係醫管局管理混亂，公立醫院服務水平低劣，延誤病情。講真呀，香港咁多醫療事故及藥物事故，好明顯係因為周一鑊、林秉恩呢啲醫療庸官領導無方，尸位素餐，搞到成個公共醫療系統亂七八糟，打錯針、斷錯症根本就係家常便飯。
講開發霉藥，瑪麗醫院舊年先至出過事，八名癌症病人懷疑服用受污染嘅降尿酸藥物別嘌醇後死亡，查咗一輪，先至證實呢批係發霉藥，原來藥廠將別嘌醇半製成品儲存多日，令毛霉菌大量孳生，死因庭裁定其中三人感染毛霉菌致死。死者家屬直斥衞生署監管失職，冇為藥物做安全檢測，同幫兇冇乜分別！
講到底，物必先腐而後蟲生，無論霉藥霉針，都係因為霉官而起，公共醫療唔想繼續發霉，必須盡快踢走霉官，叮！
