毒菇可殺人 切勿當兒戲

時值三伏，唔止酷熱難頂，仲係食物安全事故高發期，食物衞生當局千祈要醒醒定定，好好把關，稍微瞌吓眼瞓，後果隨時會好大鑊。

呢，又有人進食菇類中毒喇。日前兩批共四名市民食咗喺銅鑼灣崇光百貨超市買嘅雜菇之後，出現腹痛、嘔吐同肚瀉徵狀，要送院治理，好彩最後都冇事。雖然衞生署衞生防護中心同食環署介入調查，建議百貨公司暫停出售有毒雜菇，但係直到尋晚至披露入口商嘅資料，足足慢咗幾拍，叮！

菇類中毒後果可大可小，衞生防護中心○八年至舊年共接獲九宗同類個案，其中一宗仲有人死亡添，唔驚就假。本來呢，有人中招，消費者梗係想知道有問題嘅雜菇係乜嘢牌子，來自何方，以免重蹈覆轍。點知百貨公司只承認出事嘅雜菇來自內地，拒絕透露品牌。

預防勝於治療，菇類近年被視為健康食品，通街有得賣，食物衞生當局應該加強監管，盡早查出有毒雜菇嘅源頭，並且對外公布，減低市民中招嘅風險。如果事先唔把好關，鋪鋪都要等到出事至補鑊，遲早再搞出人命嘅咋。

查實，本港食品安全情況一向不樂觀，甚至可以用「危機四伏」嚟形容。以夏天消暑妙品雪糕為例，早排就有著名意大利高級食肆嘅雪糕球樣本，被驗出總含菌量超標。另一間喺荃灣嘅雪糕店，其中一款軟雪糕嘅大腸桿菌含量，更被發現超標近一百八十倍。

就算喺屋企煮幾味，一樣唔敢保證安全。食環署食安中心早排收到市民投訴，話食咗腐乳通菜之後腸胃不適。食安中心順藤摸瓜，驗出一個內地牌子嘅腐乳樣本蠟樣芽胞桿菌超標，其中一個樣本更加超標三十三倍。出街食飯隨時中招，屋企自己煮亦唔安全，民以食為天，變咗民以食為憂，簡直防不勝防。

話時話，當局監管後知後覺嘅例子數不勝數。遠嘅唔講，早前德國腸出血性大腸桿菌肆虐歐洲，造成多人死亡，本港食安中心居然無動於衷，等其他國家發現問題食物之後至跟進，而且又唔公布化驗結果，要市民自己上食安中心網頁查找，簡直係攞人命較飛。

一句講晒，今次毒菇事件再次暴露食物衞生當局後知後覺，漠視市民生命安全。食品安全防線失守，港人提心吊膽，寢食難安，真係唔知幾時至可以食番餐安樂茶飯。叮！