跨境學童奔波 麻木官僚懶理

香港嘅《保護兒童及少年條例》講到明,置兒童於無人照管下,即可能觸犯疏忽照顧兒童罪,最高刑罰入獄十年。點知今時今日,疏忽照顧兒童嘅正正係特衰政府自己。

近年來往深港兩地嘅跨境學童數字激增,當局唔去諗計方便小朋友過關,反而設置人為障礙,不斷留難跨境學童。官方數字顯示,本學年來港返學嘅跨境學童有八千三百幾名,因為當局限發禁區紙,可以搭保母車返學嘅唔到六千一百名,二千三百人成為「無紙學童」。

教育局兩年前推出「特別配額」畀過境巴士營辦商,為學童提供跨境直通校巴服務,弊在當局做一半唔做一半,批出班次之後,校巴行駛路線冇統籌,因為部分學校申請人數唔夠,好多班次開唔到,幾百名學童被「遺棄」,焗住每日獨自過關再搭港鐵返學。

講起呢班「人海孤鴻」就陰功咯。好似其中一位十歲小朋友咁,未計由深圳屋企到出境大樓嗰程,過咗關之後要搭港鐵再轉巴士,或者步行二十分鐘,穿過商場,橫過馬路,千辛萬苦至返到學校,途中萬一遇上意外甚至畀壞人呃,你話點算呢?

叮!跨境學童愈來愈多,便利安排反而愈來愈少,禁區紙本來就唔夠,仲要進一步收緊,你話港府係咪倒行逆施吖。當局話咁做係因為邊境交通不勝負荷喎,問題係,中港關係日益密切,跨境學童不斷增加係人都估到,當局諸多藉口,擺明卸責啫。

虎毒不食子,官懶害死人。如果港府真係關心學童,應該及早採取措施改善邊境交通,做好配套,而唔係罔顧學童利益,要佢哋冒險同班專業水客爭過關,要家長日日擔心子女安危喇。

政務司司長唐英年早排扮晒嘢去羅湖同落馬洲管制站了解跨境學童情況,拍晒心口承諾「最大程度方便學童」,但對收緊禁區紙衍生嘅問題,佢只係用「會不時檢視合理數目」嚟敷衍。最搞笑就係,唐唐巡視邊境學校嗰陣,居然建議喺深圳起多幾間學校,等港人內地子女就近入學,解決跨境學童攀升嘅老大難問題喎。

叮!佢係咪紅酒飲大咗吖?跨境學童舟車勞頓落嚟返學,理由好簡單,就係對內地教育冇信心,就好似內地孕婦打崩個頭都要來港產子嘅道理一樣。唐唐連呢點都唔明,唔怪得跨境學童安排七國咁亂咯。

計太一叮話齋,高官唔係將子女送去外國留學,就係安排子女入讀貴族學校,點會了解跨境學童嘅苦況吖,難為當局仲好意思自吹乜嘢「以民為本」,真係信佢一成,雙目失明,叮!

「Money18免費即秒股票報價網站」現推出8升級功能,財經資訊,實時實發!