夏日炎炎搵食難　高官涼薄話之你

小暑殺到，大暑逼近，天文台接連發出酷熱天氣警告，日日三十幾度，問你點頂。其實，避暑方法好簡單，就係少出街，留喺室內歎冷氣，可惜唔係人人都可以咁歎，大多數打工仔手停口停，外面氣溫再高、日頭再曬，都要頂硬上。

呢，前日酷熱天氣警告下，一名九巴車長揸住架冇冷氣俗稱「熱狗」嘅雙層巴士，喺油麻地埋站嗰陣突然中暑暈倒，送院治療後幸無大礙。

「熱狗巴」車廂氣溫高達三十六度，已經接近人嘅體溫，直頭好似焗桑拿咁，正一「蒙古王打仔——大汗疊細汗」，根本散唔到熱，焗到車長暈低何足為奇。好彩架巴士當時已經停定，如果剷上行人道就死得人多咯。

同一日，有食環署外判工人喺山坡除草中暑暈倒；亦有電視台工程人員維修期間中暑及失足跌傷。唉，烈日當空，打工仔流汗流血，開工真係要搵命博㗎！

勞工處提醒僱主，酷熱天氣下要評估僱員中暑嘅風險，僱員亦要定時飲水同減少體力消耗。而勞工及福利局局長張建宗回應立法會議員提問時則聲稱，已向巴士公司提議，炎熱天氣下唔好使用冇冷氣嘅巴士喎。

叮！鬼唔知阿媽係女人咩！你班高官日日坐喺辦公室歎冷氣，講就天下無敵，做就有心無力。有立法會議員講得啱，堂堂一個國際都會，酷熱天氣警告下，居然仲用「熱狗巴」服務乘客，搞到連車長都頂唔順暈低，簡直係香港之恥。

其實，預防中暑並唔複雜，關鍵係當局肯唔肯規管。好似地盤工人酷熱天氣下嘅安全問題咁，業界一早就話畀港府知，地盤缺少飲用水同遮蔭地方，中暑機會大增，但當局一於借咗聾耳陳對耳詐唔知。

舊年有工會調查發現，五成紮鐵工人曾經有中暑症狀，高溫之下冇額外休息時間嘅中暑機會更超過六成。但唔講都唔知，原來本港並冇法例訂明工人喺酷熱天氣下可以享有休息時間。

美國國家氣象局早就訂立咗酷熱指數，規定僱主因應濕度同溫度，畀工人適量嘅休息時間。本港勞工處話就話建議僱主炎熱天氣下安排小休時段，但呢個只不過係指引性質，並冇法律效力，根本就係無牙老虎，僱主睬你都多餘。

夏日炎炎搵食難，高官涼薄話之你。張建宗話炎夏時期會加強巡查，如果僱主冇執行指引，導致員工中暑，唔能夠逃避責任。計太一叮話齋，連規定工人喺酷熱天氣下有額外休息時間嘅法例都冇，真正逃避責任嘅其實係港府自己。叮！