冇品占士鋤樽恰細路

勞資糾紛陷入拉鋸戰,NBA宣布進入史上第4次停擺(Lockout,意即停工),新球季舉行遙遙無期,一眾球星亦正式展開漫長的暑假。當中出名乞人憎的勒邦占士,於休季期間依舊冇品,上星期竟於訓練營鋤樽恰細路,為免再招話柄惟有送簽名波鞋補鑊!

高調過檔熱火被視為叛徒,季後賽又愈打愈跌Watt失落冠軍指環,占士心情當然差到爆。「大帝」上星期出席於新澤西舉行的青少年籃球訓練營,期間示範3分投射接連「炒粉」,瘀爆占士於是飛身鋤樽「攞尾彩」,但就撞到籃底下的一位小朋友四腳朝天,全程被在場家長用手機拍低。

送簽名波鞋補鑊

兩年前占士出席夏日訓練營時,被佐敦哥羅福於頭頂鋤樽,及後贊助商NIKE充公拍片者的短片,惹來大批球迷不滿。為免重蹈兩年前覆轍,占士事後贈送一對簽名波鞋給該名11歲小朋友作補償,但短片近日在互聯網流傳後,「大帝」依然被網友喪插:「教小朋友打波都要鋤樽,占士是不是輸波輸壞腦?」