自願醫保搵笨 港府硬銷添怨

做事淨係識「頭痛醫頭，腳痛醫腳」，本來已經夠衰，如果係「頭痛醫腳，腳痛醫頭」，九唔搭八，咁就衰上加衰。呢嗱，本港公共醫療體系百病叢生，港府唔識對症下藥，反而本末倒置，硬銷搵笨自願醫保計劃，呢個就係最佳例子嘞。

點解話係硬銷呢？食衞局公布自願醫保計劃諮詢結果，聲稱有超過六成人支持喎，所以建議落實計劃，最快二○一五年上馬咁話。喂，醫療官僚耳聾聽唔到民意啫，雙眼無盲㗎，諮詢報告明明雞乸咁大隻字指出，公眾同醫療界都對方案細節有保留，其中贊成引入儲蓄機制以支付年老時保費嘅市民更加不足六成。政府講啲唔講啲，一味唱好，同祈福黨落嘴頭氹人入天仙局有乜分別？

本來呢，醫保方案如果真係幫到市民，港府擘大眼講大話都算啦，橫掂又唔係第一次，之但係好可惜，實情係方案極之搵笨。到目前為止，一切具體細節欠奉，點樣確保私家醫院嘅醫療質素，如何防止「套餐價錢」變龍躉海鮮價，點樣防範保險公司濫收保費，全部白紙一張，連食衞局局長周一嶽自己都答唔出，咁就要市民硬啃，你話係咪搵老襯先？

仲有呀，根據方案，長期病患同長者等高風險人士要畀附加保費，最高去到一般保費嘅兩倍。大佬呀，老人家晚年富泰嘅，都唔使靠醫保啦，儲蓄有限嘅公公婆婆先至係最需要嘅一群，但係醫保方案食水咁深，咪即係擺明唔受老人家玩。咁嘅醫保計劃，你話係咪本末倒置，九唔搭八吖？叮！

最搞笑嘅係，醫保方案唔只畀市民鬧爆，連理論上係最大得益者嘅保險界同醫學界都怨聲四起。民調顯示，醫學界五成人批評醫保計劃削弱專業自主，三成二認為損害醫療質素。保險界立法會議員就嘲諷港府，指業界受保限制苛刻：「我哋都係含淚接受咋！」

計太一叮話齋，對住個咁爛嘅醫保方案，想喊嘅係廣大市民就真啦。講到底，自願醫保計劃根本就係港府嘅「自保」計劃，想將公共醫療嘅責任一嘢推晒畀市民，自己就關人個關。大家唔好咁笨嘞，港府教㗎嘛，購買保單要睇清楚，條款有唔清晰更加可以拒簽，家吓大家就要拒絕接受搵笨醫保！叮！