辦學團體說不　校本管理被廢

香港未來睇教育，教育未來睇學校，學校未來唔使問，梗係睇管理啦。弊就弊在跛腳鴨政府嘅教育改革同推行其他政策一樣，都係得個亂字，明明係好嘢都搞到一鑊泡。

港府為推行校本管理，○四年通過咗《教育條例》，規定全港所有資助學校都要成立法團校董會，今年七月一日前要遞交法團校董會章程。眨吓眼「大限」已到，但至前日為止，仲有四成學校即三百幾間拒不從命，甚至有辦學團體發表聲明，公開反對成立法團校董會，明剃港府眼眉。

今次說不嘅係基督教循道衞理聯合教會，佢哋聲稱「成立法團校董會並不會帶來學校任何正面之貢獻」，堅持對屬下學校擁有實質領導權。仲有吖，聖公會亦表示，屬下七十幾間資助學校未有計劃依期成立法團校董會。

查實，最抗拒設立法團校董會嘅天主教香港教區，幾年前已就《教育條例》提出司法覆核，並已上訴到終審法院，依家仲等緊聆訊。

叮，今鋪熱鬧咯，本港大多數有宗教背景嘅辦學團體齊齊Say No，當港府冇到，試問點頂？咁多學校企硬，教育局只係話會繼續「提醒」同「勸喻」，睇嚟法例又係未曾推行先跪低，變咗廢紙一張。

講開又講，校本管理係全球大趨勢，大多數歐美國家都實施緊，成立法團校董會可以增加學校管理嘅透明度同問責性，根本冇理由反對。部分辦學團體平時「民主」不離口，一旦涉及自己利益，就即刻反面，乜嘢民主都係假，講起嚟真係好笑。

話到尾，最抵鬧嘅係不知所謂嘅政府，校本管理得到多數民意支持，但當局居然一味委曲求全，搞到辦學團體有樣學樣，齊齊剃港府眼眉，呢啲咪叫捉蟲囉。叮！

唉，教改亂龍不特止，港府施政根本冇樣掂。清拆僭建物拖泥帶水，結果僭建物未拆，高官一個個被踢爆知法犯法，帶頭僭建，自己先拆招牌；處理內地孕婦來港產子問題同樣進退失據，為求行政便利一刀切，搞到港人內地配偶跪馬路圍堵高官座駕；至於霸王硬上弓強推立法會議員出缺替補機制，更加搞到天怒人怨，逼市民上街遊行。

計太一叮話齋，政策混亂，係因為思維混亂，講白啲即係官員「腦殘」。教育條例變廢紙，校本管理得個吉，港府冇晒誠信，冇晒威望，呢屆政府究竟捱唔捱得到夠鐘收工，真係好難講。叮！