眾叛親離猶死撐 獻醜不如早收工

夕陽政府，風雨飄搖。前日立法會答問大會變成聲討大會，場外近千市民怒吼，場內數十議員齊齊開火，曾蔭權施政不得民心，成為眾矢之的，簡直好睇過大戲。

民怨沸騰都未算，最難堪係眾叛親離。唔只建制派議員倒戈相向，連行會成員亦同夕陽政府保持距離，十四個非官守成員只得三個出席答問大會，召集人梁振英甚至走咗去附近嘅交易廣場大講治港理念，搞到煲呔曾發爛渣，暗批梁振英「政治抽水」。呢嗱，話口未完，另一位行會成員張炳良亦出嚟抽水喇，佢暗寸煲呔曾，話復建居屋雖然有爭議，但唔可以將問題留畀下屆政府。

正所謂，牆倒眾人推，不推白不推。煲呔曾四面楚歌，成為喪家之犬，惟有語無倫次亂噏一通。人哋要求盡快復建居屋，佢就九唔搭八講歐債危機；人哋問佢幾時至肯下台謝罪，佢就懶幽默答明年七月一日。老實講，一諗起煲呔曾仲要做多三百幾日，好多市民都笑唔出啦。

唉，唔怪得煲呔曾畀人叫浮雲曾，佢唔只視民望如浮雲，仲雲遊太虛，答非所問，本身就係一舊雲。

其實，特衰政府敷衍塞責，得過且過，點止復建居屋一拖再拖，貧富懸殊、安老問題、醫療問題、經濟轉型……喺煲呔曾七年任內全部無解決到，問題甚至愈來愈惡化添，唔使問阿貴，呢啲燙手山芋梗係統統留畀下屆政府㗎喇。最好笑嘅係，煲呔曾一事無成，仲大言不慚話要奮鬥到最後一分一秒喎。叮，佢掙扎到最後一分一秒，港人豈不是要被迫忍受到最後一分一秒！

講番政治抽水，可以話係煲呔曾政府嘅獨有現象。張炳良話喎，因為行會成員都係社會一分子，有責任反映民意，如果大家希望行會成員面對公眾，就唔好太執着係咪違反集體負責制。講白啲，即係話政府施政與民為敵，行會成員為求自保，惟有狗咬狗骨，反戈一擊。

講到尾，勉強係無幸福嘅，夕陽政府眾叛親離，再死撐都係苟延殘喘嘅啫，與其撐得咁辛苦，不如順應民意自動落台，好似老董咁，起碼都走得灑脫啲吖！不過咁，今次最好有啲創意，背痛又好，心痛又好，或者頭痛都好，總之唔好再用腳痛呢條舊橋喇！