剿匪攻略外洩 警隊高層混帳

警方又又又又又爆出內部機密文件外洩醜聞，今次已經係第N次發生同類事件。警隊資料外洩漏洞變成無底深潭，睇嚟，市民期望警方唔再有洩密醜聞，套用一哥曾偉雄名句：係天方夜譚！

警隊外洩資料可謂層出不窮，報案人資料啦，執法行動過程啦，口供紙啦，甚至連臥底身份都可以洩露，夾夾埋埋直頭可以拍到幾套《無間道》續集。警方今次洩漏乜嘢呢？猛料咯，「剿匪攻略」大曝光！

本報前日披露，廿八份警隊內部文件近千頁紙經互聯網外洩。睇真啲，嘩，當中七份竟然係從未曝光嘅「戰術訓練手冊」。警方點樣剿賊竇、防搶槍、同悍匪駁火、營救人質……統統圖文並茂一覽無遺。亦即係話，警方同匪徒鬥智鬥力嘅戰術部署，好似被人剝光豬咁全部睇晒。

嗱，警隊外洩嘅內部文件，性質上有啲似男女明星嘅淫照，一經網上引爆即陸續有來。本報尋日又發現有十五份警隊內部指引喺網上流傳，連近年屢次成為市民示威遊行焦點嘅胡椒噴霧，警方嘅使用程序都有得教，問你服未！

弊弊弊！警方作戰秘技網上任睇，相信全世界想喺香港食大茶飯嘅悍匪都好想先睹為快，萬一賊王按照剿匪攻略部署犯案，同警方攻防作戰知己知彼，前線警員咪好鬼危險？難怪有資深警務人員擔心，戰術手冊會落入悍匪手上，全港前線警察嘅生命安全或者已經陷入險境。

警匪對決生死一線之間，剿匪攻略理應屬警方高度機密，乜解究會外洩嘅呢？據講，外洩嘅戰術手冊屬○三年版同○七年版，懷疑係警隊幾年前北上官方交流時留低複製品，今年三月被人上載於兩個內地網站，於是火速喺網上熱傳。

吓？警隊高層有冇混帳啲呀！關於前線警員生命安全嘅作戰手冊，竟然缺乏完善保密程序，就算借咗畀人，都唔可以完全唔理，關人個關o架！各位警隊高層，如果借畀人觀摩嘅係閣下嘅私人珍藏個人裸照，試問仲會唔會以咁兒戲嘅態度處理？如果閣下係露體狂又另計啦。

即係咁，如果話淫照風波源於有「集郵癖」男明星一時大意，無適當處理私人電腦資料，咁警隊亂七八糟三番四次發生洩密災難，肯定就係管理層渾渾噩噩、監管粗疏啦。好心各位警隊高層，唔該速速堵塞洩密漏洞，你哋都唔想香港成為大賊天堂o架，叮！