黑妹靚得起

「黑妹」大個女喇！一向「男仔頭」形象的香港羽毛球領軍人物葉姵延，早前因國際羽聯頒布「着裙令」而愛上「扮靚」。雖然制度已被取消，但無阻「黑妹」對化妝及Styling的興趣，今次變身淑女，直言是時候慢慢學習扮靚，告別昔日「Man爆」形象，做個「靚得起」的「黑妹」。

「打咁多年波，成日都覺得運動員係男仔頭o架喇！」葉姵延自03年加入港隊至今，總以短髮示人，自年初國際羽聯公布將實行「着裙令」後，「黑妹」為配合着裙形象，開始留長髮「轉形象」：「當時制度一定要我們女仔穿裙比賽，如果我仲咁男人頭的話，着裙會好怪，所以先打算留長頭髮，順便箍埋牙。」

當初為着裙令改變形象

不過頭髮未長，「着裙令」已於一片反對聲中被廢除，但23歲的「黑妹」直言也希望藉此改變形象，日前更跟隨星級化妝師Meegan，到觀塘一間樓上時裝店揀衫兼學化妝。

「黑妹」當日獲Meegan由頭到尾替她作貼身打扮，從修眉、畫眼線、貼假眼睫毛、塗粉底唇膏，以至於店舖選裙襯衫等，Meegan都給予專業意見，經過約1小時的「大變身」，「黑妹」搖身一變成為令人眼前一亮的「美少女」！

滿意新造型終於做番自己

「嘩！好靚呀！」沒帶半點浮誇，記者在場眼見「黑妹」變身後「當堂唔認得」之餘，只能以「嘩嘩」聲嚟形容。惟多年來以運動員身份出入的她，穿起高跟鞋走起路上來仍難免有點粗魯及不自在，但她在鏡前「照來照去」對新造型表示大感滿意：「好OK！我真係未試過化妝化到咁『行』，之前同朋友試過化一次妝，但都無今次咁靚，最重要係我由大細眼變了雙眼皮，同埋最滿意個髮型。」其後Meegan亦為「黑妹」選了一套以長褲加長靴的造型，「黑妹」立即變身一貫的「型女look」，走幾步路後滿意說：「終於做番自己！」

眼見「黑妹」變身後入型入格，擁多年化妝經驗的Meegan亦大讚「黑妹」只要多加打扮亦可以「好靚」：「佢本身膚色好好，只係平日運動流汗多，令皮膚較乾，但只要做吓mask，平日化淡妝都可以好靚！」Meegan亦建議「黑妹」可多穿及膝短裙或one piece，遮蓋大腿肌肉，並以鮮色襯衫為主，以配合其健康的運動員形象。

唔愛Shopping畀媽咪逼買衫

獲化妝師及記者一致好評，平日不施脂粉的「黑妹」也稱會嘗試慢慢轉變形象：「其實朋友都一直叫我化妝及護膚，但自己每次練完波後都好懶，有時累得連洗面都懶，隊友喺宿舍成日敷mask同洗面都叫埋我，但我只會維持幾日就放棄，今日開始可能會從基本的護膚着手，再慢慢學複雜的步驟。」

「女人三分姿色，七分打扮」是「黑妹」母親經常鼓勵囡囡買衫的說話，「黑妹」笑稱：「以前阿媽成日笑住話：『人哋阿媽就叫個囡唔好買咁多衫，我就要逼個囡買衫』，因為我唔鍾意行街，一年可能只得新年先會專登買新衫，但今次先知原來自己着呢啲衫都OK嘅。」嘗試是踏入新階段的開始，為了「Keep住靚」，相信「黑妹」從今起必定大舉入貨，告別波衫波鞋「男仔頭」的日子！

認識葉姵延

花名：黑妹

出生日期：

1987年8月6日（23歲）

身高/體重：163cm/57kg

加入港隊：03年

威水史

10年廣州亞運女單銅牌

09年東亞運女單金牌

06年多哈亞運女單銀牌

05年亞青賽女單及女雙銅牌