施政講法不講理　塑化政府遲早死

有一日，港府「曾兄弟」坐直升機巡視。財爺曾俊華講：「如果我依家丟張一千蚊落去，執到嗰個肯定開心死。」曾蔭權聽到，好得戚咁話：「如果我丟十張一百蚊落去，咪變十個人開心？」呢個時候，前座嘅駕駛員忍唔住叫咗出嚟：「妖！點解唔丟埋自己落去啫？咁咪有七百萬人開心囉！」

無錯，呢個網上笑話係諷刺港府派錢派到天怒人怨，派到幾咁不得人心。網民之所以惡搞「曾兄弟」，理由相信都唔使太一叮多講，港府派錢派到滿城風雨，初時話新移民冇份，被人狠批分化香港人；後來跪低派畀新移民嘞，又因為加咗個入息審查門檻，被人鬧爆搞「分化再分化」。所以話啫，港府派錢呢鑊嘢，喺現實世界其實都係純屬笑話。

「曾兄弟」成日添煩添亂，搞到香港無時安寧，計太一叮話齋，何止虛構角色駕駛員想丟佢哋落直升機，簡直全港市民人人得而丟之！呢嗱嗱嗱，平機會主席林煥光就好睇唔過眼嘞，批評港府派錢要新移民接受入息審查，雖然合法但不合人情，會造成社會嚴重分化。

林煥光係咁講嘅，派錢政策以「香港永久居民」做分界線，雖然不違法，但係就造成道德矛盾。佢舉例話，移咗民去外國落地生根嘅香港人，理論上已經唔將香港作為「家」，港府照派六千蚊，但係實實在在住喺香港嘅新移民，反而要有限制先至可以受惠，邏輯上已經自相矛盾。

仲有，林煥光認為港府一刀切限制所有內地孕婦來港產子，一樣係講法唔講理嘅劣政。事關內地大肚婆中部分係港人喺內地嘅合法妻子，佢哋腹中塊肉最終都會成為香港一分子，無理由未出世就受到港府歧視咁冇陰功。林煥光呼籲港府以「較人性化」方式處理，將分娩配額優先畀中港家庭。

林煥光呢番肺腑之言，諗落唔係無道理㗎，新移民雖則話未係「永久居民」，但係無情情淪為港府派錢政策嘅「二等公民」，又難怪有人為佢哋不值。至於港人內地妻子要求來港產子嘅訴求，唉，林煥光都係慳番啖氣暖肚啦，同塑化政府講人性，咪即係對牛彈琴，各位大肚婆都係自求多福啦！

一句講晒，施政講法不講理，塑化政府遲早死。理性寬容一直係香港人嘅特質，但容忍係有限度嘅，不停被層出不窮嘅混帳政策刺激挑釁，香港終會重演五十萬人上街一幕，到時唔知輪到邊個腳痛呢？叮！