醫管局粉飾太平 母嬰院亂七八糟

人有病梗係睇醫生啦，咁醫管局有病呢？一樣要睇醫生！之但係好不幸，結果係愈醫愈弊。

醫管局前年推行「醫院認證先導計劃」，簡單嚟講，即係聘請海外專家為本港公營醫院把脈診症，定期巡視，搵出需要改善嘅地方。本來呢，公立醫院問題多多，百病叢生，睇醫生係好應該，之不過咁，如果醫管局好大喜功、弄虛作假，靠飲紅牛、啪威而鋼嚟騙取一張驗身健康證明書，咁就唔止耽誤病情咁簡單，仲分分鐘谷爆而亡都有之。

咁啦，不如聽聽醫護人員組織點講先啦。佢哋控訴，公立醫院鬧醫護荒，人手六個蓋冚十個樽，當局仲要強推認證計劃，任由大量文書工作榨乾醫護人員，咁做係咪好大喜功先？醫院服務未改善先惡化，認證計劃虛有其名，醫療質素不升反跌，咁仲唔係弄虛作假？

仲有，屯門醫院內科醫生踢爆，屯院明明婦科服務爆煲，內科湧現醫生離職潮，但係認證結果仍獲好評，話無造假成分，講都無人信啦。所以話啫，醫生組織批評醫管局搞認證係粉飾太平，真係講得一啲都無錯。

不過話時話，醫管局想粉飾太平，太一叮唔覺得出奇㗎，大家知啦，香港公共醫療體系早就病到五顏六色，直頭由裏面爛到出面，唔髹番啲批盪點見人呀？其他唔講吖，當局對內地孕婦湧港產子問題全無規劃，搞到醫院產科床位供不應求，依家連社區嘅母嬰健康院都淪陷埋，你話大唔大鑊吖！

睇睇粉嶺同油麻地兩間母嬰院「爆煲重災區」，每逢兒童健康檢查時段，廣播響個不停，院內逼到水洩不通，簡直係七國咁亂。有前線醫生透露，原來嗰度八成嬰兒來自內地媽媽，部分仲係未經預約直踩入嚟求診。仲有呀，近年更懷疑有中介公司安排一條龍產後健康服務，旁門左道竟然變成專業服務。

母嬰健康院慘遭攻佔，前線醫生投訴工作壓力爆煲，連飲水都無時間，唔使問阿貴，服務質素梗受影響。港人媽媽首當其衝，谷到一肚氣事小，最驚醫護人員忙到甩轆，萬一嬰兒被人打錯針、診錯症，咁就該煨咯！

當局搞認證害慘前線醫護人員，處理內地孕婦問題束手無策，令本港媽咪受害。所以話啫，真正需要被認證、睇醫生嘅，其實係班醫療庸官就真啦，叮！