劏房遍地開花 監管一味拖延

港府議而不決慣咗手勢，連拆劏房呢個都市炸彈亦一味歎慢板。研究復研究，拖延又拖延，遲早死得人多。

土瓜灣馬頭圍道唐樓四屍五命嘅慘烈火災震撼全港，劏房失控再次引起關注，市民希望盡快杜絕陷阱處處嘅劏房，避免悲劇重演，但港府官僚一個二個好似食咗成擔豬油咁，你急佢哋唔急。

發展局局長林鄭月娥話喎，正研究修訂現行法例，將多種常見劏房工程納入小型工程監管制度，以免劏房影響走火通道，爭取明年首季向立法會提交條例草案。

事實一再證明，劏房可以奪命，市民終日生活喺危牆之下，港府居然一啲迫切感都冇，仲要等到明年至提交草案。唉，以佢哋一貫嘅拖拉作風，所謂修改法例都唔知幾時至成事，話唔定講講吓又不了了之。林鄭月娥呢位問責局長原來唔係好打得，而係好拖得就真。叮！

更離譜就係，有立法會議員建議立法規定私人住宅單位內要裝設消防設備，但當局就話工程設計有困難，費用同維修問題唔易解決，仲話現時冇法例監管私人住宅嘅消防設備，係因為住宅嘅火災危險較低喎。

簡直九唔搭八。生命無價，安裝消防設備首要目的就係保障市民生命安全，無論幾困難，當局都有責任立法監管，而唔係拖得就拖。再講，當局話住宅火災危險較低，同樣係不負責任。大家都知道，祝融無情，住宅又好，非住宅又好，一發生火災，都足以致命，何況劏房單位環境擠迫，萬一發生火警，住客逃生無路，後果更加不堪設想，唔通呢啲都叫「火災危險較低」？

係人都知，本港仲有唔少無立案法團、無管理及無維修嘅所謂「三無樓宇」，呢類樓宇普遍存在保安、消防同衞生隱患，可以講係危機處處。而劏房嘅重災區，正正係呢類舊樓，咁大嘅監管漏洞當局唔盡快堵塞，同草菅人命有乜分別？

查實，港府處理舊樓安全隱患一向玩拖字訣，執法疏懶，驗樓速度仲慢過龜爬，所謂消除隱患只不過係敷衍市民嘅咋，官僚靠得住，豬乸會上樹吖！

太一叮最擔心就係，就算港府如期喺明年初推出法例監管劏房，如果有關部門照樣好似驗樓咁，你有你急，佢有佢拖，直到再爆大鑊至知衰，到時有法例都冇用喇，叮！