搞認證捱到虛脫　醫護荒收買人命

醫院係搶救生命嘅地方，之不過喺千瘡百孔嘅香港公共醫療體系之下，公營醫院已經變咗收買人命嘅場所！

大家聽見太一叮咁講，可能即刻諗起以前發生過嘅公共醫療事故，又或者聯想到明愛醫院「見死不救」嘅醜聞。的而且確，呢類醫療失誤事件都係公共醫療系統裏面嘅奪命黑洞，不過，太一叮今日想同大家講嘅，係公營醫院另一種收買人命行為，就係長期摧殘醫護人員嘅身心健康嘞。叮！

公營醫院醫護人手長期不足，搞到婦產科瀕臨爆煲，港府最近終於出招，為明年全港內地孕婦分娩名額封頂三萬五千個，暫緩產科崩潰危機。之但係咁，產科服務勉強撐得住，唔代表人手荒問題得到解決，前線醫護一樣係捱到虛脫。太一叮無誇張㗎，唔信睇睇「醫院認證先導計劃」下嘅醫護人員慘況吖。

所謂認證計劃，即係要求醫院接受評核，率先喺瑪麗醫院等五間醫院試行。本來呢，有壓力先至有進步，呢個不失為提升公共醫療質素嘅門徑，弊就弊在當局係刻薄財主，醫院人手長期處於六個蓋冚十個樽嘅荒謬狀態。員工應付日常工作已經做到氣咳，依家仲要負責埋處理認證文件等額外工夫，百上加斤，直頭做到斷氣啦！

嗱，中大護理學院嘅調查發現，醫院員工為應付認證工作，被迫犧牲家庭生活，亦有員工要連續兩星期超時工作至午夜。有員工直言，肉體同精神近乎虛脫。大家話嘞，醫管局係咪收買人命吖？呢頭試行新計劃，嗰頭又唔加人手，你估醫護人員係鐵打嘅咩？唔係個個好似班醫療高官咁㗎，輕易將縮骨神功練到金剛不壞之身嘅最高境界。

公營醫院人手長期繃緊，前線醫護固然受害，影響公共醫療服務更加事大。呢，威爾斯親王醫院新開深切治療部（ICU）服務，原定先開設廿二張病床，又係因為護士不足，暫時只可以開設十九張。咁即係話，病人權益又受到影響囉！自詡國際都會嘅香港，如果有病人延誤接受ICU治療，而原因竟然係護士不足喎，講出去都面紅啦！

港府窮到只剩下錢，但係就遲遲唔肯增撥資源解決醫護荒問題，搞到醫護捱到虛脫、醫院服務受阻、病人權益受損，高官扮時運高乜都睇唔到，咁同明愛醫院「見死不救」有乜分別？

吖，差啲唔記得醫療高官係讀醫科出身嘅添，根據佢哋嘅專業判斷，知道所謂做到得閒死唔得閒病，只係文學比喻嚟嘅啫，各位前線醫護記得捱到虛脫都要返工呀，叮！