電梯也可奪人命 港鐵管理玩泥沙

又發生鐵路奪命事故!不過,今次唔係發生喺香港,而係喺北京;殺人嘅亦唔係列車,而係車站扶手電梯。

事故嘅發生經過係咁嘅,尋日朝早九點幾,北京地鐵四號線動物園站,大批乘客如常由大堂搭電梯上出口,點知電梯行行吓突然倒轉下滑,乘客即時好似骨牌傾倒咁跌到一仆一碌,釀成人壓人一死三十傷慘劇。死者係一名男童,同行嘅父親同姐姐亦受咗傷須送院治理。一家人搭地鐵去動物園玩,竟然變成死亡之旅。

鐵路公司急急開記者會解畫,指出事電梯仍處於保養期內,上月二十二號先至做過例行檢查同升級保養,強調一直對電梯同其他設備有徹底檢查。

咁就奇怪嘞,通過檢查嘅扶手電梯,竟然自己識得倒轉嚟行,太一叮心血少,你唔好講「猛鬼地鐵」一類恐怖故事呀!事實擺在眼前,扶手電梯變奪命陷阱,反映一係所謂嘅例行檢查只係求其交差,一係就係鐵路公司解釋不盡不實,電梯質量有問題。

正如專家所講,事故或與電梯齒輪老化、後備煞停系統失靈有關。喂,奪命電梯保養期未過,咁快就懷疑齒輪老化、系統失靈,仲唔係質量出咗大問題?

講到呢度,太一叮諗起內地另一單鐵路事故。話說上月十二號,深圳地鐵龍華線一輛由福民站開出嘅列車,行咗唔夠一分鐘,突然停喺漆黑一片嘅隧道入面,乘客叫天不應、叫地不聞三十分鐘。大吉利是講句,好彩當其時無發生火警,或者有乘客急需救治,唔係就大件事咯。

大家或者問,嘩,點解內地嘅鐵路安全咁鬼兒戲,好似玩泥沙咁㗎?以下呢個補充資料,可能幫到大家搵答案,即係咁,北京地鐵同深圳地鐵龍華線都係港鐵參與投資同營運嘅。

無錯嘞,港鐵管理層出名管理不善,列車事故層出不窮,唔係斷電纜就係壞訊號,路軌裂紋更加「足迹」遍全港。呢,本報早前先至踢爆港鐵大學站出現月台沉降爆裂危機之嘛,港鐵只係求其派人搵封邊膠「貼膠布」就算數。估唔到呢種港式鐵路管理作風已經穿越疆域界限,喺北京同深圳落地生根。

港鐵每日承載嘅唔止係客量,仲係人命,事故一單都嫌多,唔該港鐵快快執番正啲管理。如果問題出喺管理層老化生銹,咪提早換人囉,總之,咪再求求其其,草菅人命,叮!

「Money18免費即秒股票報價網站」現推出8升級功能,財經資訊,實時實發!