新鈔倒掛區旗 港府可以收皮

香港真係作反嘞！金紫荊廣場有內地客涉嫌燒國旗，幾日唔夠，又有人涉嫌觸犯侮辱區旗罪，而且疑犯仲係特區政府添！

即係咁，滙豐銀行公布發行新鈔嘅樣式，其中一百蚊面額嘅設計夠晒特色，銀紙上面嘅特區區旗竟然倒掛。由於新鈔上嘅旗杆置於右邊，咁即係話紫荊花瓣尖應該調轉為逆時針指向，但新鈔圖案竟然處於順時針狀態，一睇就知搞錯咗。

區旗代表特區，上下倒懸呢個政治錯誤可謂相當低B，亦相當嚴重。國際上慣例，「倒掛國旗」代表戰敗國，香港新鈔倒掛區旗，係咪存心詛咒特區政府先？如果唔係，咁唔通係要引人遐想，就係夕陽港府跛腳無能，好快就要「收旗」？

無錯，港府的確無鬼用，連出新銀紙都可以搞出大笑話。新鈔設計理論上審批嚴謹，一般要過三關，即係話，新鈔先由滙豐負責，再經金管局審閱，最後由行政署過目。之但係，「倒掛區旗」竟然可以過完一關又一關，負責把關嘅港府官僚究竟係眼盲，定係冇帶腦返工呢？如果內地翁燒國旗要問罪，咁港產官僚有辱區旗，又該當何罪呀？

諗起都好笑，人哋話有奶便是娘，港產官僚受緊特區政府俸祿，飲緊特區政府嘅奶水，但係竟然連真假區旗都認唔出，究竟係乜嘢搞到佢哋咁無心肝，渾噩到連阿媽都唔認得？

嗱，發現烏龍新鈔嘅中學教師就係咁講嘅，區旗象徵特區，新鈔擺咗咁大烏龍，除咗反映官員處事草率，亦反映特區高官對待區旗、區徽態度兒戲，香港話就話回歸咗十四年，其實人心從未回歸！

講到呢度，太一叮忽然諗起，早前「史上最廢」預算案觸發巨大民怨，咪有人發動「紫荊花革命」嘅，今次百元新鈔革命性將區旗倒掛，將紫荊花花瓣逆行，會唔會係有心人暗中策動新一輪顛覆行動呀？區旗反轉，寓意好明顯啦：反嘞！反嘞！

古時農民作反，將起義字條藏喺月餅裏面，今日「紫荊花革命」訊息透過百元新鈔以利是形式傳遞，簡直一絕啦。橫掂特衰政府咁鬼無用，連區旗都可以成日搞錯，可以收得皮啦，叮！