愈補愈大鑊 跪完可再跪

港府官僚唔止腦殘，仲嚴重缺鈣，左撐右撐企唔直，正一跛過跛腳鴨。立法會議員出缺替補機制跪低，焗住搞個諮詢嚟補鑊，點知愈補愈多漏洞，睇怕今次又係跪低收場居多。

當局推出嘅諮詢文件列出四個方案，可惜未曾諮詢先添亂，即時引發新一輪口水戰。政制及內地事務局局長林瑞麟勝在面皮夠厚，除咗繼續做「人肉錄音機」，仲現場「解畫」，但就愈解愈唔清，愈解愈面懵。

林公公話，除咗第二個方案，即係港府之前提出嘅由同一名單替補方案唔會受到法律挑戰，其餘三個方案就唔敢寫包單喎。

咁都得?未知合唔合法就推出諮詢，仲有冇兒戲啲吖？呢，有立法會議員話到明，諮詢方案第日可能會面對司法覆核挑戰。亦有議員批評，林公公推出替補機制，開頭話係最後方案，家陣又失驚無神推出四個方案，完全係一場鬧劇。

買一送三益街坊？替補機制牽涉憲政，亦涉及法律，點可以咁兒戲㗎。冇錯，議員藉辭職玩變相公投係浪費公帑，但當局唔經大腦，急就章推出甩甩漏漏嘅諮詢文件再惹爭拗又點計先？咪一樣係搵納稅人老襯，叮！

有學者批評，諮詢文件有唔少引導性嘅地方，譬如使用「耗用公帑」一類字眼，令人覺得補選係浪費納稅人金錢。當局呢頭搞諮詢，嗰頭又亂噏無謂，將簡單事情複雜化，加劇矛盾，簡直係九唔搭八，添煩添亂。

正如有政黨話齋，四個方案並唔包括維持現狀，就算市民選咗方案，都係無可奈何嘅選擇。有泛民議員將方案定性為「假諮詢」，仲衰過二十三條立法，話會發動市民齊齊要求當局撤回方案。

矛盾激化，互不相讓，呢單嘢睇怕都幾難擺得平。唔使問阿貴，今鋪抗議浪潮肯定升級，分分鐘唔止掟紙飛機、堵塞馬路咁小兒科，問你怕未！

話時話吖，針對部分政客搞搞震，堵塞現行補選漏洞無可厚非，市民多數支持添。問題係跛腳鴨政府實在太廢，蠢到冇朋友，一係喺唔適當嘅時候做唔適當嘅事，一係阿茂整餅冇嗰樣整嗰樣，想唔撞板都幾難喇。

衰開有條路，港府今鋪睇怕又係跪硬嘅嘞，弊在無論當局點跪，泛民都唔會收貨，佢哋志在完全撤回方案。諮詢方案送上「打狗棍」，泛民仲唔痛打落水狗，去到盡咩。計太一叮話齋，呢啲咪叫自己捉蟲，與人無尤囉 ，叮！