通脹飆升民生苦 仲唔快快打老虎

封建時代有「苛政猛於虎」，現今社會亦有「通脹猛於虎」，如果苛政同通脹都係老虎，邊隻惡啲？答案梗係通脹老虎兇猛啲啦！大家都有眼睇，嗰班只識制訂苛政嘅港府高官，對住通脹老虎束手無策，全部跪低晒啦，叮！

嗱！通脹老虎又發惡嘞。港府公布，六月份整體消費物價指數比上年同期勁升百分之五點六，唔止高過五月份嘅百分之五點二，更加超過全年百分之五點四嘅通脹預期，仲創下三年新高添。打工仔加人工蝸步牛行，而物價就好似禿鷹咁一飛沖天，百物騰貴，升斗市民生活艱難，唔怪得民怨指數同通脹率拍住上啦。

查實，內地通脹同樣創出三年新高，香港嘅物價指數唔會低得去邊，通脹率節節上升根本係意料中事。反而最令人擔心嘅係，導致通脹飆升嘅元兇房屋租金同食品價格升勢擴大，呢樣就真係唔講得笑。

先講租金吖，以前講起租金貴，最慘嘅就係無資格住公屋嘅夾心階層。租金年年起勢加，做無殼蝸牛的確好慘，之不過咁喎，今日提到租金昂貴，大家諗起嘅可能係嗰班「棺材房」住客，佢哋交緊三百蚊呎租，貴過山頂豪宅多多聲。

即係咁，香港號稱國際金融中心，點解會有人要瞓棺材房？何解被視為都市炸彈嘅「劏房」遍地開花？罪魁禍首之一咪就係租金飆升囉，貴到一般蟻民根本住唔起，加上政府房屋政策一塌糊塗，輪唔到公屋咯喎，咪惟有住棺材房、瞓劏房、逼籠屋囉。之不過咁呀，如果通脹再咁一路升上去，有冇棺材房住客變露宿者，咁就真係好難講嘞。

租金貴，基層擔心無瓦遮頭，食品不停漲價，升斗市民最怕無啖好食。過去呢一年，柴米油鹽樣樣加，尤其係豬肉，貴到可以列為奢侈品，呢家嘢相信家庭主婦最清楚。依家職業女性放工去街市買餸，最高貴嘅身份象徵唔係有名牌手袋，而係個買餸籃入面有件豬腩肉。

所以話啫，通脹猛於虎，一個租金，一個食品價格，真係令到老百姓苦上加苦。曾蔭權話，香港房價升到好得人驚，其實租金加幅一樣嚇死人，港府一直對問題束手無策，呢樣先至最得人驚。財爺曾俊華唔知粟米斑塊飯幾錢碟，其實睇吓通脹走勢就一清二楚，好心咪咁笨啦。

嗱嗱嗱，通脹飆升民生苦，通脹老虎四出噬人，「孖曾」係時候瞓醒嘞，快快出招打老虎，遏租金、解民困！咪話太一叮唔提醒你哋呀，如果仲唔快快做嘢，民怨指數飆升得肯定仲快過通脹，叮！