醫局拋棄窮人 關愛基金百搭

用「政治萬金油」形容名不副實嘅關愛基金，真係夠晒傳神。但凡港府有乜施政失誤，有乜政策甩漏，循例搵關愛基金執手尾。早排向新移民派錢嘅爭議未平息，當局又向關愛基金伸手啦。

今次「萬金油」搽啲乜？原來係幫醫管局補鑊。當局決定，關愛基金醫療援助計劃會資助病人採用六種自費藥物，治療包括血癌、大腸癌、乳癌及肺癌等七種癌症，有關計劃下月起接受申請，預計頭一年會有一千名公立醫院病人受惠。

話分兩頭講，癌症藥物昂貴，病人獲得資助接受治療梗係好事啦。不過咁，對症下藥治病救人係公立醫院責任。呢啲病人之前負擔唔起貴藥，得唔到適當治療，完全係因為醫管局縮骨卸責，整個「藥物名冊制度」出嚟，將貧困病人打入另冊。

講開又講，港府舊年高調宣布成立一百億元嘅關愛基金，話係要為福利制度以外嘅漏網之魚提供協助，弊在基金備受質疑，簡直係個怪胎。資助項目違背初衷，好似同扶貧完全無關嘅「資助遊學」、為幫「史上最廢」預算案補鑊向新移民發放六千蚊等，樣樣無厘頭，漏網之魚未幫到，爭拗就惹咗唔少，叮！

醫管局罔顧弱勢社群嘅苦況推出藥物名冊，等於歧視窮人，迴避責任，變相搞「冇錢冇藥醫」。如果要補鑊，橫計掂計都係醫管局嘅責任，家陣居然又係由關愛基金嚟收拾殘局，你話係咪九唔搭八吖？

醫管局推卸公共醫療責任，已經見怪不怪啦。公共醫療體系資源錯配問題嚴重，前線醫護人員不堪負荷，士氣長期低落，服務質素每況愈下，但局方一直拒絕改革，鋪鋪都係頭痛醫頭、腳痛醫腳。

呢，公立醫院長期鬧人手荒，前線人員做到得閒死唔得閒病，壓力爆煲，病人叫苦連天，醫護人員惟有用腳表達不滿，紛紛離職。但醫管局唔從根本入手遏制逃亡潮，反而小打小鬧，用所謂「止血」措施虛應故事，敷衍市民。

醫管局宣布，人手流失嚴重嘅部門，前線醫生候召每月獲發放額外津貼，人手短缺愈嚴重，獲發津貼愈多，希望六個月內搵到長遠解決方案咁話。但前線醫護狠批局方唔正視問題，新措施聊勝於無，根本解決唔到問題。

計太一叮話齋，公共醫療本來係港人嘅驕傲，但班醫療衞生高官管治無能，政策亂龍，搞到好地地嘅公共醫療系統千瘡百孔，家陣仲要靠關愛基金嚟填氹，簡直丟人現眼。