政治漫畫熱賣 多得廢官促銷

一年一度嘅書展又開鑼喇，同往年一樣，又係盛況空前，人頭湧湧。港人可以理直氣壯咁話畀全世界知，香港再唔係文化沙漠，而係威到爆嘅讀書之城、文化都會。

書展咁熱鬧，主辦機構同參展書商固然功不可沒，但最大幕後功臣非煲呔曾莫屬。全靠佢瞓身做推銷，治港無方形象深入民心，吸引唔少人「捧場」，書展至會咁墟冚咋。

今年書展最特別之處係，唔少人對政治書籍感興趣，有書商趁機重推諷刺煲呔曾無能嘅政治漫畫集，譬如《曾氏笑話》、《狂插煲呔》等等。

有參展商一於玩大佢，買書滿一百元贈送「魔鬼煲呔」匙扣一個；亦有以煲呔曾為對象嘅政治笑話集，借「分析面相」揶揄挖苦。

正如有人話齋，政治漫畫之所以受歡迎，係因為政府醜態百出、低能無限，令創作題材多到用唔晒。政治漫畫內容反映當權者喺市民心中嘅形象，其實係對施政缺失嘅側面批評。

跛腳鴨政府做邊瓣衰邊瓣，無論派錢、扶貧定係推出所謂替補機制，樣樣搞到一鑊泡。呢次居然做番齣「好戲」令到書展旺爆，實在難得，參展商真係要多得呢個政府唔少咯，叮！

講開又講，煲呔曾呢個孤獨推銷員「凝聚」民怨嘅功夫好耍家㗎，呢，今年七一遊行本來冇乜焦點議題，但當局喺最後一刻失驚無神整個替補機制出嚟催谷人氣，結果遊行人數急升至二十二萬。

話時話嘞，家陣情況同○三年五十萬人上街十分相似。當年董建華施政亂晒大龍，有出版商推出政治漫畫《老懵董》，結果熱爆書展，跟住又陸續出版一系列諷刺高官無能嘅漫畫，老懵董卒之要腳痛落台。

今屆政府一蟹不如一蟹，幾乎冇一樣得到市民認同，煲呔曾民望插水，支持度跌到危險線。尋日又有團體公布最新調查結果，喺民生政策、經濟及規管、政府運作、人權自由同政制五大範疇，市民對港府信心全面報跌，齊齊創出歷史新低，其中政府運作評分更錄得「三連跌」添。

計太一叮話齋，政治漫畫捲土重來賣個滿堂紅，書展變咗反映港府施政無能嘅「輸展」，證明民意不可違，廢官不可恕，唔知煲呔曾有冇覺得邊度開始隱隱作痛呢？