授勳變分豬肉 高官人人有份

每逢回歸紀念日，好多市民打招呼都會問：「今年上唔上街？」而高官見面則會問：「今年上唔上榜？」唔使問阿貴，上街梗係參加七一大遊行啦，至於上榜咯喎，咪就係港府一年一度嘅授勳囉。

呢，港府今年嗰份授勳名單，不出所料又係自己友圍威喂，幾乎高官自己玩晒咁滯。兩人獲頒最高榮譽大紫荊勳章，其中一個係行政會議召集人梁振英。至於金紫荊星章名單仲熱鬧，連搞到藍天白雲無影無蹤嘅環境局局長邱騰華、復建居屋玩拖字訣畀市民鬧爆嘅運輸及房屋局局長鄭汝樺，亦齊齊上榜。叮，呢個金紫荊星章含金量到底有幾多，大家心照啦！

授勳唔同太公分豬肉，照計應該論功行賞至係正路㗎，點知曾蔭權分派荷蘭水蓋，居然私相授受，自己友人人有份。

反而喺賽場流血流汗為港爭光嘅運動員最多得個榮譽勳章，有人甚至只得一張「行政長官社區服務獎狀」；而喺菲律賓人質慘劇中捨己救人嘅香港領隊同兩名團友，亦只係獲追頒金英勇勳章。你話嘞，嗰啲庸碌無能、做邊瓣衰邊瓣嘅港府高官何德何能攞金紫荊星章吖？叮！

有學者踢爆，近年從政嘅高官同政策局常秘，至少都攞到個金紫荊星章。呢次獲授勳嘅高官權貴大多數同煲呔曾關係密切，授勳名單明顯有政治分贓味道，實際上已淪為「高官自己友俱樂部」。

學者就講得啱嘞，睇吓歷年授勳名單就會發現，煲呔曾精甩尾，有好嘢都先益自己友。呢，年年估錯數嘅財爺鬍鬚曾攞過大紫荊勳章，為香港打造豆腐渣工程短樁居屋嘅房屋署前署長苗學禮，亦分到個銀紫荊星章。仲有吖，邱騰華舊年硬食慳電膽現金券鬧劇隻死貓，今年補番個金水蓋，算係對佢捨身救主嘅打賞。

話時話，如果高官有自知之明嘅，授勳之後好應該疊埋心水，將功補過，可惜結果完全唔係嗰回事。好似孭鑊多過食飯嘅食衞局局長周一嶽咁，任內醫療事故頻生，問題食品不斷，前年竟然獲頒金紫荊星章，你話係咪笑死人吖。弊就弊在佢攞咗荷蘭水蓋後，一樣係每周一鑊，今年仲搞到大肚婆都要參加七一遊行，咪就係佢嘅最新「傑作」囉。

夕陽政府施政無能，民怨滔天，但係高官個個有豬肉分，果然係一人得道，雞犬升天。計太一叮話齋，煲呔曾唔夠一年就收工，蘇州過後冇艇搭，佢咁鍾意益自己友，唔爭在快快手頒番個超級荷蘭水蓋益埋自己吖。笨！