議員民望創新低 行政立法累鬥累

港府施政一塌糊塗，民望江河日下，本來衰到無朋友。不過，港府以後有人陪，唔使咁寂寞喇，事關肩負監察政府責任嘅立法會議員，民意支持度亦一路尋底，同港府正式係衰埋一堆嘅難兄難弟。叮！

立法會議員嘅民望點低法呢？港大最新民調顯示，受訪市民對議員整體表現嘅滿意度只得一成，較三個月前下降三個百分點，表示不滿嘅就有五成一，民望淨值為負百分之四十一，創下相關調查九八年以來新低。嗱，五十步別笑一百步，以後議員鬧港府不得民心，記緊醒多句畀自己呀。

點解立法會議員嘅民望咁低嘅呢？調查機構話，相信同最近嘅替補機制風波有關。對於呢個講法，太一叮唔敢質疑，之不過咁，冰封三尺，非一日之寒，議員民望插水，其實又點止咁簡單吖！

講最基本嘅，立法會嘅憲制責任就係監督港府施政，但係尊貴嘅議員有冇做好呢份工呢？答案係冇嘅。夕陽政府施政愈嚟愈烏煙瘴氣，曾蔭權同班高官固之然罪責深重，之但係立法會亦難辭其咎。家吓行政立法累鬥累，民望一齊衰鬥衰，簡直可以話係因果循環嘅必然現象啦。

嗱，議員職責本分做唔好，個人操守一樣有問題，搞出醜聞不斷。呢，早前刮起僭建風暴，大批議員就被揭發立法犯法。醜聞曝光之後，部分議員仲不知悔改，託詞拖延清拆嘅有，惱羞成怒埋怨傳媒多事嘅有，甚至搵錯假案例嚟為自己狡辯嘅都有。試問咁嘅立法會，市民點樣滿意得落？如何支持得嚟？

仲有，大懶蟲遍布整個議事堂。立法會秘書處紀錄顯示，議員嘅蛇王陋習未改過，出席率低又遲到早退。最離譜嘅係，當社會有重大事件發生，議員就一窩蜂加入相關委員會博曝光，但當議題淡化之後，就爭相缺席甚至退出。照咁講嚟，嗰啲成日喺開會期間搵周公嘅議員，都算係盡忠職守咯。

大家係咪好奇，想知邊個係懶蟲議員呢？嗱，如果《東方》、《太陽》太好賣，大家買唔到尋日嘅嚟睇，唔緊要，摷番上年份報紙都差唔多o架嘞，人名來來去去嗰一堆。講到經典咯喎，就梗係有「三點不露」外號嘅李國寶啦，今年佢又榮登超級懶蟲之列喇！

一句講晒，議員民望創新低，咎由自取無得賴。各位尊貴議員唔該好好監察番自己嘅表現啦，唔係盞令立法會變成真正嘅垃圾會，遲早被市民唾棄o架咋。叮！