犯大錯照出糧 鐵飯碗養懶人

如果有人介紹份工畀你，講明就算你懶散失魂闖下彌天大禍，都唔使炒魷魚，唔使減一毫子人工，仲可以因禍得福減少工作量添。你聽到之後嘅第一反應，相信唔係講多謝，而係開口就鬧：「咪玩啦！世界上邊有咁荒謬嘅事！」

咪住，原來真係有咁荒謬嘅事，真係有咁筍嘅工o架！不過，全港幾十萬間大中小企都搵唔到，去社署搵啦。

同社署打工點筍法呢？不如睇睇呢單法庭案件吖，包你啟發良多。事情係咁嘅，社署有一位社會工作主任，喺○七至○九年間，疑因疏懶做漏嘢，本來要幫一名婦人申請遺產管理而唔記得，本來要安排一位病人接受手術又無跟進。最離譜嘅係，佢竟然無匯報上司補救，反而試圖掩飾過錯，夠膽死偽造「死亡證」虛報兩個事主已經死咗，最後東窗事發，被法庭裁定兩項在公職中行為失當罪，判罰二百四十小時社會服務令。

好嘞，專業社工違反職業操守，將生人當死人辦本來已經夠晒荒謬，但係原來社署仲荒謬，竟然對犯法員工毫無實質懲罰。嗰位大錯特錯嘅社署主任，判刑後繼續返工，繼續出糧，只係調派較為清閒嘅工作崗位。嘩，飯碗保得住都唔止，工作量又少咗，從打工仔角度嚟講，簡直就係獎勵，點講都唔係懲罰啦，吓話！

更加荒謬嘅係，犯案人被法庭裁定在公職中行為失當，賣晒新聞紙，但係上年底，社工註冊局仲批准佢續牌喎，唔通貪佢偽造死亡證嘅水準夠晒專業？直到最近，社署嘅內部紀律聆訊有結果，決定將佢降級為助理社會工作主任，社署拒絕透露有冇減人工，只強調聆訊結果經過嚴謹及公正考慮。

嗱嗱嗱，唔怪得官僚部門成日唔係呢樣出錯，就係嗰樣出錯啦，員工犯咗嚴重錯失，甚至干犯刑事罪行，一樣工照返、糧照出，工作量反而仲少咗，咁咪即係等如鼓勵員工犯錯！咁就更加唔怪之得，做事得過且過、粗心大意會成為港產官僚嘅施政特色。

話時話，員工做錯嘢唔使罰，或者求其輕罰敷衍了事，絕對唔係社署獨家本色，而係成個公務員系統嘅通病。根據資料，過去五年因刑事定罪而被當局紀律處分嘅公務員共有七百七十六人，但係當中只有七十七人被革職，被處分降級更屬極少數。

所以話啫，公務員係鐵飯碗，真係一啲都無錯，就算點樣疏懶、點樣失德甚至干犯刑事罪行，飯碗依然絲毫無損，花都冇花過。各位大懶蟲、大懶蛇仲唔快啲遞求職信？叮！