巴士公司呻窮 求救不如自救

怪事處處有，香港特別多，年年賺大錢嘅巴士公司居然不斷呻窮，問你服未。呢，繼九巴要求設立票價穩定基金，由公帑資助，新巴同城巴亦聲稱油價上升對經營成本構成壓力，生意難做，要求政府批准徵收燃油附加費喎。

所謂燃油附加費，即係航空公司收開嗰隻，之不過，飛機還飛機，巴士還巴士，巴士公司受專營權保障，車廠用地由政府低價批出，已經變相接受公帑補貼。家陣巴士公司要求額外徵收燃油附加費，即係繞過票價機制再掠一筆，加重市民負擔，咁樣巧取豪奪法，大家唔反對就假啦，叮！

至於要求公帑資助設立所謂票價穩定基金，更加行唔通喇。大家都知，香港奉行資本主義，做生意一向自負盈虧，如果政府資助巴士公司，其他私營機構有樣學樣，個個想食大鑊飯，個個都向政府伸手，豈不是天下大亂！

講番燃油成本，太一叮想同大家計一條數。○八年國際油價升穿每桶一百四十美元高位，巴士公司照樣有錢賺。家陣油價只係一百美元左右，但巴士公司已經嗌晒救命，話業績可能出現虧損喎，你信唔信吖。退一步講，就算巴士公司真係出現虧損，亦未必因為油價上升嘅啫，可能因為經營不善，亦可能因為冇做好成本控制。

正所謂，窮則變，變則通，雖然油價上升加重巴士經營成本，但應對嘅辦法其實仲有好多，譬如實施更加靈活嘅分段收費，吸引短途乘客。巴士公司不思進取，唔去改善營運，淨係識得嗌窮，淨係識得攤大手板要求市民同政府出錢填氹，你話係咪好荒謬呢？

計太一叮話齋，唔止巴士公司荒謬，特衰政府都係一擔擔。九巴聲稱旗下六成路線蝕錢，主要係因為路線重疊，攤薄客流，造成不必要嘅浪費，只要政府推行路線重組，唔止可以避免浪費、減少污染，仲可以紓緩交通擠塞添。既然好處多多，點解仲唔快啲做呢？其實，港鐵路線愈開愈多，的確搶走唔少巴士乘客，所以長遠嚟講，政府唔只要考慮重組巴士路線，仲應該全面檢討公共交通政策，咁先至係治本之道吖嘛。

講到底，政府嘅責任係改善營商環境，唔係用公帑資助私營機構。巴士公司與其攤大手板，不如諗吓點樣改善營運，世界上邊有包賺嘅生意o架，叮！