教師考試肥佬多 教育產業變笑話

名師出高徒，劣師出低徒，咁半桶水普通話老師又出乜呀？出笑話囉！

當局公布教師基準試評核報告，嘩，簡直令太一叮大開眼界。報告揭露，有考生語言天分奇高，考普通話科課堂語言測試，竟然英文、廣東話統統出齊，兩文三語一齊嚟，問你服未！有啲考生就鬼死咁有幽默感，考拼音寫漢字時，將「幽默」寫成「妖魔」，將「驀地」寫成「摸底」，擺明想幽考官一默啦。嗱嗱嗱，教師先生你唔好話真係唔識呀，咁就真係笑話o架嘞！

其實，睇番今年教師基準試嘅成績，真係令人笑唔出。普通話科考生嘅聆聽、辨認同口語表現，合格率全部得五成左右，即係有近一半人肥佬。至於英文科，亦係海軍鬥水兵，其中寫作部分更加多達六成三考生唔合格。報告列舉大量例子，指出考生文法錯誤連篇，各位家長不妨攞份報告返屋企，仔女有咗呢份反面教材，英文話唔定從此大有進步。

教師基準試理論上係畀現職教師或者有志為人師表嘅人報考，睇見呢張成績表，真係為香港學生嘅語文水平擔心。以普通話測試為例吖，雖則話今年二千三百幾個考生中，未必全部都係教書先生，就當七成係嘞，當中至少幾百人日日喺學校誤人子弟，諗起都恐怖。如果有日你嘅仔女跑過嚟用普通話讚你：「爸爸，你真妖魔！」就算你幾有幽默感，都一定笑唔出。

唉，為人師表語文測試表現不濟鬧出笑話，固之然要打手板，但係港府係咪一句叫學校「炒晒班不濟教師」就可以置身度外，關人個關？如果教育官員記性唔多好，等太一叮同你哋溫溫書吖。教師基準試已經實施將近十年，考生合格率年年偏低，教師質素備受質疑，但係當局多年嚟究竟做過乜嘢去提升教師質素？

嗱，教育人士講得啱㗎，如果教師語文水準良莠不齊，整體學生嘅語文水平肯定受影響，結果就係拖低本港競爭力，影響深遠。仲有，港府咪打鑼打鼓話要發展教育產業嘅，如果師資質素每況愈下，招納外地學生變誤人子弟，咁咪盞變成國際大笑話！

其實，師資質素對學生成長至關重要，呢個道理都唔使人教啦，唔該教育官僚快快諗計，提升本港教師語文程度！喂喂喂，你哋都唔想香港做唔成「紐倫港」，變咗「沉淪港」o架，叮！