工業意外頻生　搵食有如搏命

生命至上，安全第一，打工仔個個都想開開心心出門口，齊齊整整返屋企。弊在香港工業意外三頭兩日嚟一劑，打工仔生命毫無保障，真係令人慨嘆。

呢，話口未完又出事喇。葵涌一個地盤尋日發生奪命工業意外，一個巨型鋼筋鐵籠突然散架倒冧，兩個工人走避不及畀幾噸重嘅鋼筋壓斃。業界人士話意外可能同地面有暗斜，或者接合點唔夠穩固有關。

意外成因固之然有待調查，但點講都好，兩名慘死工人正值壯年，都係家庭經濟支柱，天降橫禍破壞咗兩個大好家庭，親人從此陰陽相隔，打工仔悲歌唱不完，真係諗起都心酸。

無獨有偶，大埔白石角一個建築地盤尋日亦有意外發生。一名紮鐵工人做做吓嘢突然暈倒，送院搶救不治，懷疑同氣溫過高有關。話時話，酷熱天氣唔係講玩o架，除咗呢位工人不幸身亡，又有巴士車長中招嘞。一架俗稱「熱狗」嘅冇冷氣巴士返到黃大仙樂富總站時，車長懷疑中暑感到頭暈不適要送院。

呢次已經係本周第二單巴士車長開緊工被焗暈嘅意外。日前有位九巴車長喺油麻地鬧市埋站時，亦係懷疑因為中暑突然暈倒喺軚盤上，好彩巴士當時已經停低，先至冇造成傷亡咋。

今時今日，工業意外頻生，打工仔開工幾乎要搵命博，講起真係無奈。其實，要確保工業安全，嚴格監管必不可少，雖然話政府唔係萬能，但本港工業安全毫無保障，幾乎仲落後過第三世界地區，簡直係香港之恥，當局監管失職，執法不力，責無可卸。叮！

講番酷熱天氣下工作安全呢筆，係人都知高溫下做嘢，除咗要避免長時間暴曬，亦需要更頻密嘅休息同補充水分，唔係嘅話分分鐘會中暑。

有建築業界人士指，部分中小型地盤冇提供足夠飲用水畀工人，亦缺少遮蔭地方，更冇提供額外休息時間，所以有需要立法，以保障工人安全。點知當局關人個關，淨係以一紙形同虛設嘅所謂指引敷衍了事。叮，地盤工人烈日當空冒住中暑風險開工搵食，港府官僚就坐喺冷氣房入面無動於衷，簡直豈有此理！

唔講唔知，本港工業意外傷亡率竟然比日本、韓國高五至十倍，真係失禮死人。咪話太一叮唔提醒，隨着多項大型基建陸續啟動，如果當局懶理工業安全，繼續視勞工生命如草芥，隨時死得人多，佢哋自己亦走唔甩嘅咋，叮！