民生不滿創新高 只怨港府太糟糕

曾蔭權幾年前自爆響口話「視民望如浮雲」，唔少市民聽咗都好擔心，驚香港從此無運行。梗係啦，特區之首當民情民意無到，我有我享受，懶理你感受，咁搞法，香港邊會有好日子過吖？

嗱，事實證明，當日市民嘅擔憂絕非杞人憂天o架。港大最新民調顯示，市民對民生狀況嘅不滿比率節節上升，比起一月份又再急升九個百分點，累積上到五成八，創出十九年新高。不滿政治狀況嘅比率亦升到五成三，係○四年中以來嘅最高位。嘩，如果恒生指數都可以咁樣屢創高峰，香港就真係想窮都難咯。

可惜，願望通常無法成真，如果望嗰樣有嗰樣，香港人都望煲呔曾快啲腳痛，又或者變走晒班高官先啦。事關市民對民生狀況嘅不滿與日俱增，正正就係佢哋一手造成。

民調機構分析，近期嘅替補機制風波、權貴僭建醜聞、最低工資爭議同「史上最廢」預算案風暴等等，都係激發市民不滿比率急升嘅原因。計太一叮話齋，冰凍三尺，非一日之寒，民怨好似坐穿梭機咁「嘭嘭」聲飆升，根本就係港府施政混亂日積月累嘅必然結果就真啦。

先講民生吖，衣食住行，生老病死，港府有邊樣唔係搞到一塌糊塗o架？香港號稱國際都會，但係今日蜚聲國際嘅唔係維港夜景，亦唔係購物天堂，而係最物非所值嘅樓價同冠絕全球經濟發達體嘅貧富懸殊堅尼系數呀！仲有，煲呔曾大吹大擂嘅「六大產業」、「十大基建」，唔係變晒爛尾樓，就係化身高大空嘅吹水泡沫，市民唔把幾火就有鬼。

至於政治狀況咯喎，既然官僚管治失敗導致市民生活水準每況愈下，政治環境自必然王小二過年，一年差過一年o架啦。呢個道理就好似白鴿黨總幹事陳家偉光顧一樓一鳳，醜行曝光就梗係會累到白鴿黨嘅政治前途黯然失色。

民生不滿創新高，只怨港府太糟糕。其實，市民對民生狀況嘅不滿比率接近六成，如果換着其他民主國家，執政者早就要執包袱走人啦。之不過咁呀，大家如果以為煲呔曾睇到呢個民調結果會知驚，會諗辦法改善，咁就太天真太傻嘞。太一叮夠膽講句，就算不滿指數爆晒燈達到百分之一百，對煲呔曾嚟講都係浮雲嘅咋，絕對唔會放喺心上，叮！

所以咯喎，煲呔曾話要奮鬥到最後一分一秒，各位市民更加唔可以偷懶，一定要集結人民力量，高呼到最後一分一秒：煲呔曾落台！