普查員被非禮 統計處係幫兇

又發生風化案！從環境證供所見，涉案關鍵人物有三個，報案人：一名十八歲女學生；疑犯：一名八旬淫翁；幫兇：政府統計處處長馮興宏。

大家無睇錯，太一叮亦無寫錯，發生呢單鹹濕伯父非禮案，馮伯嘅幫兇嫌疑絕對走唔甩，事關受害人正係為統計處做緊人口普查嘅女普查員，而且今次誤入魔掌可以話係統計處一手造成，大家睇完案發經過之後就知乜嘢事。

今月十六日，亦即係人口普查上門訪談階段展開嘅第一日，十八歲報案人同三名組員一同去彩虹邨，抵埗後再分頭工作。其中女報案人單獨上樓，逐家逐戶做普查問卷，點知遇正老色狼。講起就驚險咯，案發時女報案人同八旬男戶主單對單共處一室，有人竟然見獵心起，對報案人又撞胸又摸下體，仲一度想鎖門進一步有所企圖添。好彩報案人拚命掙扎，最終逃離魔掌，唔係後果真係不堪設想。

好嘞，女普查員遇上老色狼，點解話港產官僚係幫兇呢？即係咁，統計處要未經世故嘅女學生單獨做家訪，而安排訪查嘅地方又可以話三教九流乜都有，與世隔絕嘅偏遠村屋又有，品流複雜嘅狼窩蛇竇又有，統計處咁做同一手將小綿羊送入血盆虎口有乜分別？咁又係咪等如為色狼、賊匪製造犯案良機呀？

講到呢度，太一叮終於明白嘞，早前網上咪流傳有女普查員被人「女女女」咗嘅，統計處即時澄清絕無其事，原來係想臭屎密冚，隱瞞失職。可惜吖，紙包唔住火，醜聞愈冚愈臭，難怪有前線普查員質疑，當局選擇性公布案情，實在好唔道德。

嗱嗱嗱，太一叮亦都終於明白，點解統計處突然良心發現，日前決定安排所有統計員行孖咇入屋訪查嘞，原來係遲來嘅補鑊。之但係咁喎，統計處補鑊都補得樣衰過人，孖咇制原來係「一員兩制」，同樣係普查員，負責上門覆核資料嘅「覆核員」仍然要單拖上路，唔通港產官僚真係要搞出大鑊嘢先至識驚？

所以話啫，太一叮真係好懷疑，統計處官員可能埋首冷冰冰嘅數學方程式太耐，對危險意識已經失去應有警覺。其實，人口普查實施短短十幾日之嘛，普查員被狼吻又有，被狗追因而跌落山坡又有。點解發生咁多事，佢哋都好似無乜感覺？睇嚟夕陽政府唔止等收工，直頭要即刻收檔，免得害人害物。