Marco打Golf同傅一碼講拜拜

《太陽體育》夏日專題「齊來玩過界」期期有驚喜，今日終極篇更為大家送上「雙料娛樂」，「桌球天王×高球巨聲」破天荒來一次Double Crossover！剛帶領港隊打入世界盃4強的傅家俊（Marco），先向「美少女」何雁詩（Stephanie）討教高爾夫球技術，成功擺脫「傅一碼」污名，然後變身教練為「師傅」主持一堂桌球技術深造班，還贏得Stephanie大讚一句：「Marco篤波好型呀！」　

高爾夫球近年年輕化又夠普及，職業桌壇內幾乎人人愛打Golf，連「冇乜特別嗜好」的傅家俊多年前都已對這項高難度運動深感興趣，甚至買過套球桿同朋友去Driving Range享受「哥乎樂」：「Golf好好玩，不過成4、5年都未掂過！」想再試打嗎？「好呀！順便走出戶外做運動減肥（聲稱身體脂肪比率超標要收身）。」結果在本報穿針引線下，Marco上周向廣州亞運香港高球代表、「超級巨聲」何雁詩Stephanie拜師學藝。

傅太「抄橋」公仔套落Cue

採訪當日，傅家俊期待又雀躍，反而Stephanie有點緊張：「足足3個月冇打過波，我自從6歲學Golf以嚟都未試過，好驚打得唔好……」只見小妮子非常認真，但拿起球桿依然駕輕就熟，她先是簡單介紹高球裝備，Marco見到Stephanie球桿上笠了幾隻可愛毛公仔時竟說：「好得意，Golf好多呢啲Accessorize，桌球就冇。」誰知傅太Shirley更幽默：「我買個公仔畀你套喺支Cue度，打比賽出場嗰陣一定好噱！」大家爆出一陣笑聲，「高球教室」亦在輕鬆氣氛下開始。

Marco學了基本熱身、企位及握桿手法後，就用一支普通推桿試試擊球，「扑」一聲，小白球又高又遠，飛逾150碼外，「巨聲」大叫：「哇！勁嘢嚟o架！」在場的高球中心經理也道：「原來識打嘅！」傅家俊還被取笑「揼雞」，於是Stephanie拿出最大的「1號木」（開球用），把Marco嚇窒了：「呢支唔得、好驚呀！以前試過用佢撻Q，個波跌咗去後面，畀朋友笑做『傅（負）一碼』。」「定啲嚟、定啲嚟！」經Stephanie悉心調教出桿力度、位置和動作後，「傅天王」大有進步，球球打得有板有眼，小測試（見左文）全部都過關，「傅一碼」污名終於洗脫！

希望Keep住打當減壓

「好開心！今堂獲益良多，Stephanie教得好好，最興奮係用支Driver（一號木）都打得咁遠，個波唔再溜後！」Marco強調高球與桌球有好多相似地方，但Golf難打千萬倍：「太多變化同客觀因素影響，篤波易好多！不過我好Enjoy打高爾夫球，因為可以走出戶外，呼吸大自然空氣，好Relax，又有適量運動，Keep Fit一流，最重要係對住一粒咁細嘅波，要做咁多動作，但成功將佢打出去，滿足感好大。」他更表示找到Golf新感覺，「勾番起條筋」希望Keep住打，作為減壓方法也不錯！

Marco高球小測試

「傅天王」用3支不同型號球桿擊出10球，結果……

‧1號木：第1球180碼；第2、3球逾150碼

‧8號鐵：第1球撻Q；第2至5球近100碼

‧58度鐵：第1球50碼；第2球30碼

Stephanie評語：

Marco吸收得好快，可能同打開桌球容易明白高球原理有關，佢對Golf好有Passion，呢樣係玩每項運動最重要嘅嘢，運動員唔理天資有幾多，都要堅持同熱誠先可以做得好。

Stephanie評分：

9分（10分滿分）！打咁多球都只係1次撻Q，好棒！

Marco Fu

年齡：33歲

威水史：98及02年亞運隊際金牌

03年英國超級聯賽冠軍

07年格蘭披治賽冠軍

10年亞運單打金牌

11年大師賽亞軍