復建居屋花七年 高官廢噏唔使本

七年之癢大家聽得多，有冇聽過「七年建屋」？話說香港樓價長升長有，復建居屋呼聲高唱入雲之際，運輸及房屋局常任秘書長栢志高忽然大潑冷水，話就算政府復建居屋，最樂觀估計都要等到七年後至推出首批單位喎。

到底七年建居屋係咩概念？大家不妨做個比較。話說一九七三年，香港政府推行「十年建屋計劃」，到七八年已經推出首批單位，居屋政策由無到有，只係用咗五年時間。再睇一九九七年，前特首董建華推出以起居屋為主嘅「八萬五」計劃，到二○○○年首批「八萬五」單位應市，都係用咗三年時間。

假設栢志高所講嘅七年建屋屬實，即係等於話現屆同下屆政府廢到無倫，唔止輸畀港英政府，甚至連董建華政府都不如。七年後，中國太空人可能已經上咗月球，香港地嘅無殼蝸牛舉頭望明月，可以見到偉大祖國嘅太空船，低頭思故鄉，仲未見到廢柴政府復建嘅居屋，你話係咪搞笑啊，叮！

難怪栢志高嘅偉論一出街，立即畀前房委會委員反駁，指房委會起樓一般只需四十七個月，即四年建成。栢志高早前出席區議會會議時，亦提及復建居屋只要三到五年，如今忽然「延長」興建年期，反映當局對復建居屋冇決心，所以一邊將責任拋畀下屆政府，一邊由官員大潑冷水，企圖誤導公眾，為復建居屋嘅期望降溫。

不過話分兩頭，七年建屋雖然誇張，實情又未必冇可能喎。你知啦，港府做嘢一向議而不決，決而不行，即使行起嚟都拖泥帶水。最經典嘅係港珠澳大橋，前後拖足二十幾年，好不容易等到拍板興建，又畀人司法覆核推翻環評。觀乎本地官僚嘅龜速作風，復建居屋唔好話花七年時間，拖足十年、十七年、七十年都唔出奇啦，叮！

當然，凡事都有例外。譬如添馬艦新政府總部大樓咁呀，耗資五十億元，建築美輪美奐，坐擁無敵海景，雖然工程爭議多多，但係港府排除萬難，話起就起，由動工到平頂只係用咗三年時間。鬼咩，根據港府「以官為本，以民為笨」嘅施政方針，起居屋只為升斗蟻民提供居所，同高薪厚祿嘅官員毫無關係，梗係拖得就拖啦。

講到底，今時今日作為香港人，最悲哀就係擁有一個無能無心無願景兼無承擔嘅夕陽政府。廢柴政府出廢官，廢官開口講廢話，栢志高語不驚人誓不休，真係唔知嘅畀佢嚇死，知嘅畀佢笑死，叮！