工友中暑熱死　官僚坐視不理

香港打工仔認真命苦，日捱夜捱疲勞過度猝死，已經時有所聞，家吓仲要驚多樣，熱死！

講落真係既悲哀又可笑，香港自詡國際都會，周街都係冷氣商場同寫字樓，但係工人竟然會熱死。呢，早前勞工悲歌又奏響，接連有紮鐵工人同搵食車司機中暑身亡，反映高溫殺人呢家嘢，戶外同車內都一樣會出事，更加絕無年齡、性別或者種族歧視。香港工人健康中心做過統計，今年五月至今，共有十五人高溫工作中暑，其中四人死亡。

講到呢度，大家或者會問，政府早前唔係推出咗酷熱天氣工作指引嘅咩？理論上，僱主必須為工人提供充足飲料同休息時間。係就係，弊在呢份只係指引，根本就無法律效力，僱主可以跟從，亦可以唔跟。咁嘅所謂指引，咪即係搵工人嘅健康同生命較飛！

嗱，健康中心就講得啱嘞，當局成日講「安全第一」，家陣地盤工友、戶外清潔工人同駕駛「熱狗巴」車長等等，日日置身中暑危機，返工搵命博，勞工官僚係咪好應該正視呀？台灣晨早立法規定，若然氣溫超過三十三度，從事勞動工作者需要有七成半時間休息，港府係咪應該研究向寶島睇齊先？叮！

咪住，太一叮諗起嘞，上年立法會辯論立法規管高溫工作，當時勞福局局長張建宗係咁講嘅，由於不同工種工作環境不同，不能透過立法規管。張局長講得無錯㗎，佢日日喺冷氣房嘆涼風，工作環境同戶外工友差天共地，梗係無切膚之痛啦，又點能夠怪佢坐視不理？

不如咁啦，趁今年夏天特別熱，各位工人請願叫張局長日日搭熱狗巴返工，喺地盤擺張枱當係辦公室，等佢試過烈日當空工作嘅滋味，或者會回心轉意都未定。張局長你放心呀，如果你願意接受挑戰嘅話，保證唔使你擔、唔使你抬，仲有人遞埋水畀你飲添，不過記住戴頭盔呀，萬一被工友掟雞蛋都有保護吖嘛。

講開勞工悲歌，何止戶外工人搵命博，上月至今本港至少有四名職業司機行車期間猝死。有業界反映，近期車租及油價飆升，好多司機要連踩三更搵銀幫補，敲響職業司機健康警鐘。

嗱，當局又係整色整水，聲稱有為職業司機提供免費健康測試。哈，但係業界踢爆，所謂嘅測試兒戲到極，連驗血同驗尿呢啲基本動作都欠奉，直斥運輸署只係做騷，要求運輸署完善驗身計劃，唔好再漠視司機性命安全！

太一叮知嘞，香港打工仔咁命苦，原來係因為有個淨係識做騷嘅政府，叮！