吵吵鬧鬧又一年 立會大樓空餘恨

隨着煲呔曾尋日喺立法會進行最後一次雞同鴨講嘅答問大會，呢個立法年度宣告落幕，立法會大樓亦完成歷史使命，下年度立法會將改喺新大樓重開。回顧過去，展望未來，再睇吓近年議事廳裏面發生嘅種種亂象，真係令人感慨萬分！

一九八五年起，呢座西式古典大樓就承擔起作為立法局同立法會嘅使命，眨吓眼二十幾年過去嘞，呢座大樓最令人懷念嘅，唔係民意代表點樣認真立法，點樣認真監督港府施政，而係點樣吵吵鬧鬧，點樣譁眾取寵。尤其係回歸後呢十四年，本來應該係好莊嚴嘅議事殿堂，幾乎淪為九反之地，失禮死人，唔怪得有人話立法會根本就係垃圾會。

點解堂堂立法會搞成咁？咁就要問吓班議員喇。香港假假地都行緊代議政制，港府施政唔掂，本來仲有立法會負責監督，點知班議員其身不正，唔係掛住做騷，就係掛住抽水，甚至掛住開片嗌交，監督政府就冇喇，添煩添亂就有，叮！

呢嗱，議員日日鬧政府高官，其實佢哋根本係難兄難弟，高官民望插水，議員亦唔好得去邊，甚至猶有過之添。港大最新民調顯示，市民對立法會議員嘅整體滿意率跌到只剩一成左右，創咗九八年以來新低，而對議員不滿嘅比率，更加去到五成一添。睇吓議員嘅出席率仲嚇你一驚，好似三十五次例會以及特首答問大會咁，有啲議員出席率只得六成三；至於其他小組會議咯喎，部分議員只有百分之八出席率咋，問你服未！

正如古人話齋，處其位而不履其事，則亂也。立法會議員以民意代表自居，點知一個二個變成大懶蛇，咁又點樣為民喉舌吖？有啲議員平時口水多過茶，炮轟政府不遺餘力，原來只係五十步笑百步。唉，靠呢班政客監督港府施政，為市民爭取權益，蛇都死蚊都瞓啦。講到底，香港回歸後亂象叢生，烏煙瘴氣，港府固然要負起最大責任，立法會亦難辭其咎。

吵吵鬧鬧又一年，舊立法會大樓完成歷史使命嘞，新大樓又會發生乜嘢事呢？其實，立法會喺邊度開會一啲都唔重要，最重要係坐喺入面嗰班議員係乜嘢料，如果佢哋唔能夠代表市民發聲，就算即將啟用嘅新大樓點樣富麗堂皇都好，遲早亦會淪為九反之地嘅咋，叮！