煲呔曾好大喜功 趕完工收買人命

大家應該聽過「孟姜女哭崩長城」o架啦，秦始皇好大喜功，為咗修築長城而奴役百姓，搞到天怒人怨。諗唔到咁無良嘅一幕，今日竟然喺香港重演，不同之處係好大喜功者變咗「土皇帝」曾蔭權，而「血淚長城」就係正趕工入伙嘅添馬艦新政府總部。

點解話煲呔曾好大喜功？即係咁，呢個叫「門常開」嘅添馬艦工程，係第日嘅新政府總部同立法會大樓，原定暑假竣工入伙，咁煲呔曾今年十月就可以喺新大樓宣讀佢最後一份施政報告，滿足佢嘅權力欲。

點不知，可能連個天都唔鍾意佢啦，兩年前內地四川大地震，中國修訂最新防地震標準，焗住港府都要臨時更改「門常開」嘅設計，建築工程亦因而受到延誤。現場所見，辦公大樓嘅外貌雖然大致建好，但地盤仍然一片狼藉，大量建築物資有待歸位，竹棚又未拆除。即係話，「門常開」未開得門，暑假入伙嘅大計隨時泡湯。

好嘞，如果當年萬里長城起到一半，你估秦始皇會點做呢？唔使講，梗係四圍拉壯丁，要百姓日做夜做死掂佢啦。今日「門常開」工程延誤，煲呔曾政府照辦煮碗，亦要求工人死掂佢。有地盤工人踢爆，港府為咗趕工，竟然要求建築工人加班開夜兼假日開工。近日天氣翳焗，工人要喺氣溫高達攝氏四十二度嘅封閉環境擔擔抬抬，唔中暑真係奇迹。

古有孟姜女尋夫哭崩長城，今日亦有工友妻子為夫申冤，一名工人妻子曾經去信特首辦訴苦，但係地盤嘅惡劣環境並無改善喎。有工友質疑：「係咪要等到有人死喺地盤，當局先至正視問題？」勞工界立法會議員批評煲呔曾好大喜功苦了工人，可以講係一語中的。

叮，煲呔曾為一己私欲攞地盤工人條命較飛，試問於心何忍？打工仔為咗搵兩餐，惟有頂硬上，雖則話有錢畀啫，但係要工友日夜兼程趕工，工作環境又惡劣不堪，港府咁樣做，同秦始皇勞役百姓又有乜分別？

秦始皇建長城，都話可以抵禦外敵啫，煲呔曾為滿足自己虛榮，居然要求工人為佢搏命，簡直豈有此理。咪話太一叮唔提醒，就算新政府大樓趕得及暑假入伙，萬一有工友因為趕工出事，煲呔曾隨時遺臭萬年呀，叮！