電話預約變虐老 害人延診好離譜

港府最鍾意同貧弱老人過唔去，○六年一刀切實施電話預約門診服務就係一例。政策一出台就玩殘班眼矇耳聾嘅公公婆婆，相關嘅虐老故事相信大家都聽過唔少o架啦。好嘞，五年過去，當局聲稱推出過多項補鑊措施，呢個專門折騰長者嘅新發明到底有冇改善到呢？答案係：「冇嘅。」

數字最能夠說明一切。工聯會做咗個調查，發現有超過一半受訪老人家投訴透過電話預約門診非常困難，其中近一半人投訴電話成日唔通，四成人認為預約手續繁複，近三成人認為服務未能配合即時需要。老人家眼又矇，耳又聾，又有病痛在身，仲要為預約門診頭痛，醫療高官於心何忍吖！

喂喂喂，抱病長者攞唔到籌睇門診，就會延誤診治，隨時好大件事喎。好似患有高血壓嘅胡婆婆咁，成七十歲人，只識講潮州話，一直靠丈夫幫手打電話預約覆診，點知丈夫兩年前去世，胡婆婆又聽唔明預約系統嘅指令講乜，結果兩年無覆診。直到今年初，工聯會幫胡婆婆做體檢，發現佢血壓嚴重超標，火速送佢入院診治，先至無搞出人命。

胡婆婆病情惡化，好明顯係被電話預約玩殘，延誤診治所致。話時話，電話預約門診變虐老苛政，已經唔係今日嘅事，胡婆婆大話夾好彩無事啫，但係香港唔知仲有幾多個黃婆婆、李婆婆正在耽誤病情。官不殺伯仁，伯仁因官而死，萬一有老人家出事，港產官僚剖腹都唔掂呀！

電話預約門診流弊多多，今次仲暴露多一個問題，就係有公公婆婆反映，預約名額成日「爆滿」。奇就奇在，醫管局網站明明顯示，唔同診所每日都有「餘籌」喎，咁究竟係電話預約系統出咗問題吖，定係有人預約咗冇去又冇取消，所以造成資源浪費呢？如果真係咁，醫療高官點解咁多年都睇唔到呀？定係明知都當時運高睇唔到呢？

唉，老人家捱咗大半世，點講都為香港作出過貢獻，依家老咗想睇病，都要受咁多折磨，點都講唔過去啦。港府如果唔想被人告虐老嘅話，咁就要速速考慮公公婆婆嘅意見，增設長者預約專線，由真人發聲處理長者預約門診，至少都要簡化預約程序啦。

嗱，各位醫療高官，唔好話教晒路都做唔到呀，如果真係，太一叮建議各位快快去睇醫生，檢查吓係咪大腦提早退化，不過，識得用電話預約至好呀，叮！