政壇：項明生曾呻繁體字難學
早幾日中學文憑試放榜，James項明生當日亦喺社交網站上載二十幾年前、一早發晒黃嘅「史前」會考成績單，原來佢除咗係旅遊達人，仲係「中文達人」，會考中文科奪A（1）冇難度。不過，十六歲先從內地來港、寫慣簡體字嘅佢就慨嘆學寫繁體字仲難過學英文。
項明生回憶當年英文字母都唔識多個，但其真正「死穴」原來係繁體字。
當年James來港一年半，就由原本連廣東話同英文都唔識聽，成功考獲會考1A、5B、1C佳績，英文科重考後更由C升呢上B，叻過唔少本地生。佢笑言，當年學英文除咗隨身狂啃英文字典，連落街買支洗頭水，都會擰轉樽身，將洗頭水成分嘅英文譯番中文再背誦，最後如願升讀香港大學。
但佢反而慨嘆當年「死穴」其實係繁體字，佢話當年來港冇耐就考會考，結果因為考試寫多咗簡體字，令原本有信心奪A嘅中國文學僅得B級，舊習慣亦要升讀港大後先真正戒得甩，更笑言至今仲覺得「壽」字好多筆畫好難記。估唔到多年來靠支筆搵食嘅James，成也中文、敗也中文。
