城中鏡：圓圓佗B百無禁忌
早幾日下午大約四點鐘，佗緊蔡家金叵羅嘅「玩具大王」蔡志明新抱汪圓圓同表妹Jessica湛琪清現身中環ifc商場，孕味十足嘅圓圓素顏示人，見佢着住短袖衫及熱褲，穿着輕便鞋，仲拎住一杯凍嘢慢慢歎，形象十分親民，睇嚟應該暑氣盡消喇！不過，孕婦飲食禁忌多多，係咪應該戒食生冷嘢都有好多講法，但睇嚟圓圓似乎百無禁忌喎！
汪圓圓（左二）啜住飲品聽店員講解，表妺（左）就講到七情上面、雙手叉腰。
圓圓同表妹湛琪清並肩離去，由保鏢幫手拎住戰利品。
素顏行街歎凍飲
當日圓圓同Jessica都一身輕便打扮，兩人行咗一陣商場之後，好快就有戰利品。過咗一陣，Jessica就拎部手提電腦到商場內一間專門店維修，期間兩表姐妹坐低聽店員解說，圓圓全程啜住杯飲品，好輕鬆自在，Jessica就專心同店員討論，一時雙手叉腰，一時指手畫腳，勁投入。
期間一位高大保鏢一路好盡責睇住佢哋，冇耐保鏢發現咗記者行蹤，即刻向圓圓通報，但見慣大場面嘅圓圓只係戴起黑超遮掩素顏，並冇刻意躲避鏡頭。兩人逗留大約半小時離開。
數數手指，圓圓已經懷孕近八個月，見佢雖然身形明顯發福，但係步履輕盈，睇嚟個BB佗得幾好，唔怪得佢老公蔡加讚咁放心，唔使陪住佢喇！趁機上前同圓圓傾兩句，問佢暑假會唔會出埠玩，佢笑笑口話唔會嘞，事關天氣好熱，加上佗住BB好重，所以七、八月份都唔會出去旅行。咁又係，就嚟生，都係穩陣啲好，舟車勞頓可免則免喇！
