曼聯新任領隊尹戈爾尋晚出席首個記者會，講明自己會重建曼聯，目標係冠軍而唔係前四，呢位「新魔王」又話會喺幾個星期內審視現有球員，除咗有機會作出收購外，亦暗示唔啱使就要走人。其實尹帥喺世盃前，曾經出席荷蘭「商業周」演講，大講成功3大元素─艱苦備戰、強大團隊、掌控決定權，睇嚟紅魔球員唔畀人趕走，都有排捱喇！

尹戈爾（左）同卜比查爾頓出席首個曼聯記招。（Getty Images圖片）

尹戈爾喺首個記者會表現充滿自信，着灰色西裝並打上代表曼聯嘅紅色呔，佢首先多謝卜比查爾頓引領自己到奧脫福，跟住繼續賣口乖，話自己選擇曼聯，係因為紅魔係英國第一大球會，自己教過嘅包括巴塞隆拿、阿積士同拜仁慕尼黑都係當地一哥，雖然曼聯上季只得聯賽第7，但影響力肯定係第1。

花幾星期觀察球員

至於眾人都關心嘅隊長安排、球員去留問題，尹帥都坦白回答，佢話自己會花幾個星期睇吓球員，跟住就決定使唔使作出收購，勞基梳爾同安達靴里拉就係經佢同意先買番嚟，佢希望球員可以喺自己嘅理念下做出應有表現。尹帥又話自己非常重視隊長一職，所以唔會貿然於短時間內委任隊長，但就已經訂立目標：「對我嚟講，目標係挑戰冠軍，唔係入前四。」

首日入主辣操兩課

尹帥咁有信心，可能係因為有晒重建招數，英國《每日郵報》日前播出一段尹戈爾喺荷蘭出席商業演講嘅影片，片中見到「新魔王」向觀眾傳授成功之道：「首先係訓練，我每日都會操班球員，其實每間公司都應該咁做，訓練到班員工幫你哋製造出最好嘅產品出嚟。第二，係喺揀球員之前先組織好教練團，我冇可能一個人做晒所有嘢，所以要一班精英幫我手。最後要留意嘅，就係雖然好多人會提供意見，但我一定要係話事嗰個，所有嘢應該由我做最終決定。」講得咁有霸氣，認真有紅魔教父費格遜嘅影子﹗

尹戈爾仲未正式開工，就已經將演講中嘅「商業藍圖」注入曼聯，下令要球員進行兩節操練，朝早9點半先操一課，一齊食完晏後，球員可以選擇返屋企或者喺訓練基地瞓，到晏晝5點半再操第二課，真係諗起都覺得辛苦！

計劃踢走10大毒瘤

據知，呢位鐵腕「新魔王」計劃踢走隊中「十大毒瘤」，包括香川真司、費蘭尼、艾殊利楊格、拿尼、查維亞靴南迪斯等，為帶領曼聯重登高峰，絕不留情面！

出席記者會前，尹戈爾周三就到咗卡靈頓訓練場，由西裝換上戎裝，同一班球員包括新簽嘅安達靴里拉見面，不過佢並冇作出任何訓話，只由助教傑斯介紹幾句，球員就開始練習，尹帥就企埋一邊，聽吓教練團匯報同視察訓練場嘅環境。