城中鏡：三星太子爺平民look會庫克
日前喺美國愛達荷州太陽谷舉行嘅「Allen & Company峰會」，吸引到世界各地經濟界巨頭聚首一堂，場面墟冚。而最令人Surprise嘅係，堂堂三星太子爺李在鎔竟然着住件POLO恤行出嚟同蘋果CEO庫克傾偈，呢一身平民打扮真係令人覺得好新鮮。
李在鎔
貴為三星未來接班人、現任三星副總裁嘅李在鎔，舉手投足都好受注目。然而，佢所着嘅嗰件外觀平凡嘅POLO恤，只係被形容為美國嘅實用體育品牌Under Armour，即係Cheap啦，喺美國只賣五十九點九九美元（約四百六十五港元），似乎有失身份咁話。但據深入了解，其實內裏大有文章，事關Under Armour嘅總裁趙顯俊同李在鎔係莫逆之交，今次李在鎔着住呢件衫見庫克，擺明係幫老友宣傳，希望藉住「李在鎔效應」，刺激件POLO恤嘅銷量。而美國CNBC電視亦即時報道話，Nike今後嘅競爭對手似乎唔再係adidas了，而係Under Armour！
呢位三星太子爺，準備帶領集團再創高峰之前，已率先為集團引入一套簡單自然嘅穿着文化，三星電子今個月決定允許喺水原市工廠嘅員工喺周末同公眾假期着西裝同棉質短褲返工，而之後呢個措施仲可能可以擴大去其他工廠。
