政壇：搞搞政：佳叔論政帶記者遊世界
向來語出驚人嘅中央政策組前首席顧問「佳叔」劉兆佳，過去兩年都有出書講政治局勢，今年書展都唔例外，尋日佢舉行新書發布會。唔知係咪佳叔見到咁多讀者捧場，講嘢特別放，當佢講到中港關係同佔領中環時，竟分別用伊拉克庫爾德族人同古巴導彈危機作比喻，真係估佢唔到。
設計圖片及對白
佳叔話依家港人反抗中央情緒日漸高漲，就好似喺伊拉克嘅庫爾德族人要有自己國家，唔要由伊拉克政府統治一樣，仲話雙方一日唔放低分歧、矛盾，問題好難解決。嘩，當年伊拉克為咗維穩，向庫爾德族人放毒氣彈，殺咗幾千人，唔通佳叔預料香港都有呢一日？
講到咁激，台下讀者依然冇乜反應，到有人問佢點睇佔中時，佢就再引用另一經典例子，話六十年代冷戰，美蘇兩大陣營爆出古巴導彈危機，但危機過後，反而令兩大陣營關係緩和，所以就算佔中出現流血衝突，香港社會都承受到。當年佳叔以錯判形勢見稱，好似○三年七一遊行，佢以為得幾萬人，點知結果有五十萬人。今次佳叔講嘅嘢，真係信不信由你。
