政壇：愛港力狙擊白鴿黨開會

中西區區議會一個小組早前開會時爆衝突，白鴿黨區議員許智峰後被警員抬走，白鴿黨投訴警方濫權。愛護香港力量（愛港力）十多名成員尋日去咗灣仔警察總部外請願，批評許智峰破壞會議秩序在先，期間仲涉嫌整傷咗啲保安員，警方將佢抬走係依法辦事，因此特意向警方遞交感謝信，並要求許智峰向警方道歉。

愛港力召集人李家家話，許智峰當日帶埋大班閒雜人等進入會場搞事，賴死唔走，如果咁都話冇問題，佢哋唔排除將來會「以其人之道，還治其人之身」，踩場要求旁聽白鴿黨嘅大小內部會議，睇吓白鴿黨到時又會唔會報警，要求抬佢哋走。