政壇：戴凱欣接受唔到女追男
擁有高學歷、高職位、高收入同高年齡嘅單身女性被稱為「四高」港女，有調查話佢哋好多都感覺生活得唔開心，自認屬於「四高」嘅四洲集團太子女戴凱欣（Kennis）接受電台訪問時，就自爆曾有男性友人直言唔敢追求佢，令佢有一段時間好唔開心，但依家佢覺得自己有咁多屋企人同朋友錫佢，已經好滿足同好幸福嘞，唔會再諗埋一邊喎。
戴凱欣話接受唔到女追男，交友只會順其自然。（資料圖片）
問佢會唔會主動出擊追求心儀嘅男士，Kennis坦言都曾經諗過，但最後真係接受唔到，依家交友只會順其自然，好好享受單身生活。Kennis又透露，佢爸爸、四洲集團創辦人戴德豐以前管得佢好嚴，讀大學時仍然唔畀佢自己出街玩，直到後來留學澳洲先至有番啲自由。不過，佢並無因而怪責爸爸，反而視對方為偶像，盛讚爸爸無論幾忙都好顧家，每日打幾次電話同佢傾偈。依家佢喺家族公司幫手，爸爸亦經常問佢有咩新諗頭，好重視佢嘅意見，令佢愈做愈開心。
