SUN搞作：少膽虫手記：關於3%，我想說的是……

咩叫最不尊重員工嘅機構？入得壹全霉，仲講尊重？講尊重點揭人瘡疤？講尊重點作新聞？講尊重點賣港求榮？好心你哋唔好咁天真啦，知唔知咩叫打工？工字就係不出頭，就係冇發達，唔通加5%畀你哋，你哋就食得起幾千蚊個lunch？桐油酲始終都係裝桐油，咁簡單嘅道理都唔明？

人比人比死人，其他機構加得好，關你哋乜事？人哋做記者跑新聞，氣呵氣喘分秒必爭，你哋？日日抄新聞咋！仲有你班所謂編輯，三日唔埋兩日就拳頭咁大隻錯字，我行出街畀人笑到面黃啦，仲夠膽嫌加得少？嫌炳得少就差唔多！

壹全霉咩環境，你哋心中有數啦，開唔到源，只可以無止境節流。我喺度希望點醒大家，做人要有遠見一啲，嗌生嗌死，留番遲啲減薪炒魷先啦！

（少膽虫按：是日專欄遭淫賤黎霸用，明日復常）