政壇：吳得掂亂點老師降呢
中學適齡學童人數下降，呢幾年唔少中學都出現收生壓力，而教育局預測未來幾年中一學生仲會由六萬四千人下跌一萬多人，隔幾年先會回升，教育局去年推出「三保」政策，即「保學校、保老師、保實力」。教育局局長吳克儉（吳得掂）尋日出席活動後都有回應中學老師嘅飯碗問題，佢話，預計每年有相當數字嘅幼稚園及小學老師退休，暗示呢啲都係教職空缺，唔通佢暗示啲中學老師冇得撈就降呢教小學或幼稚園？
吳得掂尋日出席「歐洲高等教育展2014」開幕典禮後，被問到中一學位未來幾年有過剩問題，佢話，雖然呢幾年中一學生人數會下跌一萬多人，但往後幾年數字就會回升至六萬九千人，所以當局要保留實力。經過去年同業界商討後，從家長、學生、學校三個層面考慮後，因推出「三保」政策，首年推行得好成功，受影響嘅班數由原定嘅一百班，大幅縮減至十二班，同時強調當局未有「殺校」計劃。
吳得掂仲特別提到，現時會以「保老師」為本，將剩餘老師人手用作減少工作量，以前冇時間進修嘅可以去做。被問到有冇信心確保老師就業？吳得掂就表現到好淡定，話未來小學及幼稚園會有不少老師退休，作為專業嘅老師，當局一定有機會安排佢哋喺不同場合對香港作出貢獻。嘩，吳得掂咁講法，係咪即係暗示叫啲老師如果無得撈，就轉去教小學或幼稚園呢？
要求待遇大不同
佢講得就輕鬆，但中學同小學師資水平、要求、待遇甚至從業者受嘅訓練都大不同，而且呢個屎橋亦可能有手尾，事關第時中學學生增加時，小學及幼稚園可能面對資深教師同時求退搵高職嘅麻煩，吳得掂依家亂咁點，會唔會埋下另一個教育炸彈o架？
