政壇：張灼祥想辦「辛苦學校」

拔萃男書院前校長張灼祥前年已經退休，但佢仍心繫教育，尋日就透露想開間「辛苦學校」，以較嚴格方式訓練學生獨立同敏銳嘅思考能力，佢話，觀察到近年好多家長都對子女過分保護，令小朋友難以建立自信心，所以佢希望可以親自教班年輕人「吃得苦中苦，方為人上人」嘅道理。

做咗十二年校長嘅張灼祥至今仍被人稱呼「張校長」，佢尋日出席教育講座分享升中心得，吸引唔少家長慕名而來。佢話，當年面試時見過好多學生答問題時表現生硬，呢類學生通常好快被「叮走」，佢就最欣賞有自信同表達清晰嘅學生，另外中英語言能力佳，同埋識得特別樂器，都可以加分。

港童嬌生慣養，張校長都分享「奇聞」，話以前寄宿學校夏天多蚊，有學生試過被蚊針咗幾啖，家長就好緊張叫學校每張床加裝蚊網，仲有學生喺校內跌親，膝頭擦傷少少，家長竟然投訴學校冇叫救護車喎。