SUN奇古怪：Sun潮語：【約炮】

記得以前有句經典手錶廣告標語，「不在乎天長地久，只在乎曾經擁有。」呢句嘢喺社會相對保守嘅九十年代，簡直好似核彈一樣，爆發出當代男女心底嘅慾望。有理由相信呢句廣告標語，喺當時帶嚟咗一場戀愛革命。以前男歡女愛大都以結婚為終極目標，追求天長地久至死不渝，最好只願一生愛一人，對愛人忠貞不二，但呢個世界變幻才是永恒，就算送上恒久遠嘅鑽石，都唔代表愛可以永留存。所以，就從嗰陣時起，愛情觀念產生咗質變，曾經擁有就可以，只要一齊嘅時候愛得轟烈，男女之間又何需天長地久？留低一段回憶就得，一生一世變成一個很脆弱嘅概念。時至今日，男女間感情關係，隨着互聯網同智能手機嘅出現，再加上世界變得複雜。年輕一代嘅愛情觀已經好唔同。以前討論中學生應否談戀愛，後來就研討婚前性行為，到依家係進行「Friend前性行為」！即係先做愛後做朋友，三唔識七都可「約炮」，做咗先講！

今時今日「約炮」當然唔係靠打電話，而係喺網上討論區，或喺一啲社交網站，男男女女發放一啲「愛的訊息」，大家再用啲即時通訊系統吹兩句水，之後有啲會約見面睇辦，有啲就直接「約炮」，爆房翻雲覆雨、追求一夜風流，之後相忘江湖，繼續慾海慈航。通常玩「約炮」都係搵陌生嘅「炮友」，又或者未必係男女朋友關係嘅「好朋友」。上床只為各自洩慾而不含愛情成分，即係「齋搞」，完全無責任，更唔使好似拍拖咁多繁文縟節，有需要時想做就做，相當即食，將男女關係杯麵化。甚至有「約炮」嘅對象係朋友嘅女朋友或男朋友，又或者係上司下屬，各自搵食各適其適。

當然，「約炮」喺依家嘅社會係好正常同平常，但係正常平常又未必係啱，習非成是已經喺香港見怪不怪。你有你「約炮」嘅自由，一樣有人相信天長地久，包括我。