道路變成地雷陣 國際都會真丟架

不妨想像吓，如果與會嘉賓嘅專車行行吓，路邊突然飛起石塊擊爆車窗，又或者車輛行行吓，路面忽然下陷，你話會有咩後果吖？到時唔止香港丟架，北京都冇晒面喇。

唔係杞人憂天，有政黨調查發現，中西區近年大小工程不斷，大批重型工程車輛出入，區內馬路不堪負荷，加上路政署護路失職，保養不力，搞到路面千瘡百孔，蓉蓉爛爛。約略估計，全區至少二十個路段有嚴重凹凸不平及龜裂、路磚下陷或瀝青隆起情況，問你驚未。

路面千瘡百孔，有礙觀瞻事小，構成安全隱患事大吖。有區議員話，接到唔少市民投訴馬路破裂，路面碎石隨時可能因為大型車輛行過被擠壓彈起，傷及途人，有人甚至因為誤踩下陷路面跌倒。仲有吖，唔少爛路黑點鄰近醫院同幼稚園，隨時禍及求診人士同小朋友。

最離譜嘅係，馬路遍布陷阱，路政署居然得過且過，求其用瀝青係咁意修補就關人個關。結果唔使問阿貴，梗係呢頭補完，嗰頭又爛喇。

即係咁，封路需要向環保署同運輸署等部門申請，路政署係咪怕麻煩而唔肯重鋪，所以修修補補就算數呢？其實，修修補補根本解決唔到問題，反而浪費公帑添。有市民要求路政署徹底重鋪，署方居然反問「係咪有即時危險先」，簡直荒謬！

正所謂，千里之堤潰於蟻穴。如果路政署唔係做嘢敷衍甩漏，處理安全隱患拖得就拖，就唔會有咁多爛路，更加唔會因為咁多爛路而導致車禍頻生喇，港產官僚唔止失職，直頭搵市民生命安全較飛。

查實，道路安全隱患又點止中西區吖，修路工程無處不在，路政署經常畀人投訴亂批挖掘許可證，又缺乏跟進監管，搞到香港變成大工地，呢度一個坑，嗰度一個窿，除咗擾民，更嚴重威脅道路使用者安全。

唔該路政署班官老爺咪再做大食懶，政府部門咪互相扯貓尾喇，快啲做好本分，將馬路執番企理，咪搞到「金融中心」變咗危機四伏嘅地雷陣吖，叮！