資深醫生紛劈炮 公院遲早走光光

公立醫院流血不止，醫護逃亡好似電視連續劇咁，長做長有。呢，又有兩名主將級醫生劈炮唔撈啦。

呢兩位醫生唔係泛泛之輩o架，一位係瑪麗醫院心胸外科部門主管鄭力翔，人稱「換心權威」，曾經為六歲「玻璃心」女童移植心臟，創下本港最年輕換心手術紀錄；另一位係廣華醫院整形外科顧問醫生張永融，人稱「整形聖手」，曾經用「高速水槍」幫鏹水彈受害少女清除受損皮膚組織。兩位名醫不約而同向醫管局辭職，即將轉為私人執業。

公立醫院一次過走咗兩名大將，都咪話唔傷。點解會搞成咁？正如有資深醫生話齋，近年內地醫療水平迎頭趕上，但香港公立醫院又無人手培訓，儀器又無更新，資源分配又唔公平，搞到醫護人員心灰意冷。話時話吖，點止資深醫生掛袍求去，連新入職嘅醫生都士無鬥志喇，淨係今年四月至六月咋，公立醫院已經流失咗近半成醫生嘞，問你點頂！

講嚟講去，又係醫療庸官累事。公立醫院人手嚴重不足，七個蓋冚十個煲，醫生個個做到氣咳，工時又長，壓力又大，反而私家醫院人工高一大截，工作又輕鬆，畀着你係醫生都識揀啦！

好笑嘅係，醫生荒愈演愈烈，當局先至話增加醫科學位，加強培養新血喎。問題係，培訓醫生閒閒地都要十年八年，醫管局嘅新血有排都未到，舊血就不斷流失，家陣連資深醫生都走埋，又搵邊個嚟培訓新人呢？公共醫療醫生協會就講得啱嘞，資深醫生離職會令公營醫療出現知識及經驗斷層，為免問題惡化，當局應該用全方位策略挽留人才。

唉，講就易咯，點樣挽留？嗰班高官渾渾噩噩，得過且過，關人個關就真。講開又講，唔係話官場係熱廚房咩？點解醫生走完一個又一個，從來唔見庸官自動消失嘅？睇嚟呢個廚房都唔係好熱嘅啫。

經濟學有個「劣幣逐良幣」嘅理論，香港公共醫療就有個「劣官逐良醫」嘅現象，尸位素餐嘅醫療庸官一日唔除，醫生逃亡潮就永遠停唔到，再咁落去，公立醫院遲早唱空城計，咁就唔知可笑定可悲喇，叮！