派錢姍姍來遲 扶貧闊佬懶理

好咯，終於派錢咯！港府應承向每名合資格市民派六千蚊，派到拖泥帶水，甩甩漏漏，市民望呀望，等呀等，望到頸都長，等到眼光光，當局尋日先至姍姍來遲公布派錢安排。

財經事務及庫務局局長陳家強話喎，本月廿八號開始登記，按出生年份分批派發，如果選擇明年四月一日之後攞錢，每人派多兩舊水添。唉，嗰兩舊水，不如留番畀佢自己好過。

講起真係得啖笑，由港府宣布派錢，到真金白銀落袋，足足等咗a九個月，如果真係等呢筆錢開飯嘅，學莊子話齋，可能全部變晒涸轍之鮒咯。無計喇，跛腳鴨政府出咗名做嘢慢過龜爬，唔嬲得咁多。點講都好，有錢派總好過冇錢派，遲到總好過冇到，睇開啲喇，叮！

話時話，當局聲稱分批派錢，又話可以上網或者由信得過嘅親友代為登記，有學者擔心，有關安排可能令長者無所適從，到時七國咁亂，搞出個大頭佛，咁就真係唔知好笑定好嬲。

講開又講，當局選擇廿八號開始登記派錢，係咪貪好意頭呢？「廿八」「易發」，唔通揸住呢筆錢就發硬？叮，發就係發，不過唔係發達個發，而係銀紙縮水變咗蒸發個發。大家都知嘞，通脹持續惡化，加上港幣跟住美元不斷貶值，人民幣又不斷升值，打工仔人工加得雞碎咁多，但衣食住行、柴米油鹽就乜都加晒價，六千蚊拖足大半年至派，可以幫補幾多，頂得幾耐，唔使講大家都知答案喇。

所以話，呢筆錢攞嚟應付通脹都未夠，扶貧紓困直頭諗都唔使諗。係人都知，本港正面臨樓價高企、貧富懸殊同人口老化三大問題，貧者愈貧，富者愈富，深層次矛盾愈演愈烈，淨係靠一次過派糖，最多甜一甜，根本止唔到咳。

如果當局真係「以民為本」嘅，就應該盡快制訂長遠扶貧措施，尤其係要盡快研究推行全民退休保障，令港人居有其所，貧有所依，老有所養，而唔係虛應故事，派少少錢敷衍民意就算數。

正所謂「唔怕米貴，最怕運滯」，計太一叮話齋，遇着施政無能、扶貧無方，甚至連派錢都派到一塌糊塗嘅煲呔曾政府，港人都算「米貴兼運滯」咯，叮！